CWG 2026: పతకాల ఒత్తిడి వద్దు.. ఆటపైనే దృష్టి పెట్టండి: ఐఓఏ చీఫ్ పీటీ ఉష

కామన్వెల్త్ గేమ్స్ 2026లో భారత క్రీడాకారులు పతకాల కోసం ఒత్తిడికి గురికాకుండా, తమ ఆటపైనే దృష్టి పెట్టాలని ఇండియన్ ఒలింపిక్ అసోసియేషన్ (IOA) అధ్యక్షురాలు పీటీ ఉష సూచించారు. CWG 2026 ప్రారంభోత్సవం అనంతరం మీడియాతో మాట్లాడిన ఆమె, ఆటగాళ్లు ఆత్మవిశ్వాసంతో ఉన్నారని, వారిపై పతకాల ఒత్తిడి పెట్టడం తనకు ఇష్టం లేదని చెప్పారు.

‘నేను ఏ ఆటగాడిపై గోల్డ్ మెడల్ లేదా సిల్వర్ మెడల్ తెచ్చుకోవాలనే ఒత్తిడి పెట్టను. వారు తమ ఈవెంట్‌పై ఫోకస్ చేసి, తమపై నమ్మకముంచి, తమ బెస్ట్ ఇవ్వడానికి ప్రయత్నించాలి. అలా చేస్తే పతకాలు సహజంగా వస్తాయి’ అని ఆమె తెలిపారు. ఇప్పటికే భారత జట్టుకు పవర్‌లిఫ్టింగ్‌లో కాంస్య పతకం దక్కిందని, లవినా అనే అథ్లెట్ కూడా ప్రారంభోత్సవానికి ముందే మంచి ప్రదర్శన చేసిందని ఉష వెల్లడించారు.

పారిస్ ఒలింపిక్స్‌లో భారత రికవరీ రూమ్ అమెరికా కంటే మెరుగ్గా ఉన్న సంగతి గుర్తు చేస్తూ, ఈసారి కూడా వైద్యబృందం అద్భుతమైన మద్దతు అందిస్తోందని ఆమె పేర్కొన్నారు. ‘క్రీడాకారులు వెనుక చాలామంది శ్రమ ఉంటుంది. ఆ వెనుక పనిని సక్రమంగా చేస్తే మంచి ఫలితం వస్తుంది. ఈసారి కూడా వైద్య సదుపాయాలు సమకూర్చాం. ఆటగాళ్లకు అవసరమైనదంతా అందిస్తున్నాం. వారు కేవలం తమ ఈవెంట్‌పై దృష్టి పెట్టి, బెస్ట్ ఇవ్వాలి. అంతేగానీ ఒత్తిడికి లోనవ్వొద్దు’ అని ఉష స్పష్టం చేశారు.

కామన్వెల్త్ గేమ్స్ పోటీలు రానున్న రోజుల్లో పూర్తి జోరు అందుకోనుండగా, భారత ఆటగాళ్లు ఈ ఒత్తిడిరహిత వాతావరణంలో తమ సత్తా చాటే అవకాశం ఉంది.