ధాన్యం కొనుగోలు జాప్యంపై పుల్లూరు రైతుల రాస్తారోకో

సిద్దిపేట జిల్లా పుల్లూరు గ్రామ రైతులు ధాన్యం కొనుగోలు జాప్యంపై నిరసన తెలిపారు. ముస్తాబాద్ రహదారిపై రాస్తారోకో చేయడంతో రెండు వైపులా వాహనాలు నిలిచిపోయాయి.

పుల్లూరు గ్రామంలో సుమారు 2,500 ఎకరాల్లో వరిపంట సాగైంది. కోత పూర్తయి 30 రోజులు గడిచినా IKP సెంటర్ వద్ద ధాన్యం కుప్పలు అలాగే ఉన్నాయని రైతులు తెలిపారు. పుల్లూరు IKP సెంటర్‌కు rice mill కేటాయింపు జరగలేదని రైతులు ఆరోపించారు.

ప్రస్తుతం ఒక్క పుల్లూరు గ్రామంలోనే 100 లారీల ధాన్యం పేరుకుపోయిందని రైతులు చెప్పారు. ప్రతిరోజూ లారీకి 5 నుంచి 50 బస్తాల వరకు కోత పెడుతున్నారని ఆవేదన వ్యక్తం చేశారు. బండచెల్లర్లపల్లె IKP సెంటర్‌కు వారంలో కేవలం రెండు రోజులు మాత్రమే సేకరణ జరుగుతోందని రైతులు పేర్కొన్నారు.

భారతీయ కిసాన్ సంఘం తరపున రైతులు మాట్లాడుతూ, తక్షణమే ధాన్యం సేకరణ ప్రారంభించాలని డిమాండ్ చేశారు. స్పందన రాకపోతే మరింత పెద్ద ఎత్తున ఆందోళన చేస్తామని హెచ్చరించారు. ఈ విషయంపై ప్రభుత్వం స్పందన తెలియాల్సి ఉంది.