రాజమండ్రిలో ₹100 కోట్ల ఫ్లైట్ ట్రైనింగ్ సెంటర్ శంకుస్థాపన చేసిన బీజేపీ ఎంపి పురందేశ్వరి

రాజమండ్రిలో ₹100 కోట్ల పెట్టుబడితో జార్విస్ ఏవియేషన్ అకాడమీ ఫ్లైట్ ట్రైనింగ్ సెంటర్ ఏర్పాటు చేస్తున్నారు. ఈ సెంటర్‌కు బీజేపీ ఎంపి పురందేశ్వరి శంకుస్థాపన చేశారు. ఆరు నెలల్లో ఇది అందుబాటులోకి వస్తుందని సంస్థ వర్గాలు తెలిపాయి.

జార్విస్ ఏవియేషన్ సీఈఓ ఫనీంద్ర మాట్లాడుతూ, దశలవారీగా ఏడాదికి 500 మందికి శిక్షణ ఇవ్వనున్నట్లు తెలిపారు. ఒక్కో బ్యాచ్‌లో 30 మందికి పైలట్ శిక్షణ ఉంటుంది. పైలట్లతో పాటు ఎయిర్ హోస్టెస్, ఎయిర్ ట్రాఫిక్ కంట్రోల్ (ఏటీసీ) సిబ్బందికి కూడా ఇక్కడ శిక్షణ ఇవ్వనున్నారు.

రాజమండ్రిలో ఆధునిక విమానాశ్రయం, ఐఎల్ఎస్ సౌకర్యం, శిక్షణకు అనుకూల వాతావరణం ఉండటంతో ఈ లొకేషన్ ఎంచుకున్నట్లు ఆయన వివరించారు. దేశంలో 166 విమానాశ్రయాలు, 9 ఎయిర్‌లైన్స్‌ ఉండటంతో పైలట్లకు డిమాండ్ పెరిగిందని చెప్పారు.

సాధారణంగా ఇలాంటి అకాడమీకి 4–5 ఏళ్లు పడుతుంది. కానీ కేంద్ర పౌర విమానయాన మంత్రి రామ్మోహన్ నాయుడు చొరవతో 5–6 నెలల్లోనే అనుమతులు లభించాయని ఫనీంద్ర తెలిపారు. అకాడమీ కోసం ఆరు విమానాలు ఆర్డర్ చేశారు. కేంద్రం సిద్ధమైన తర్వాత విద్యార్థుల నియామకం జరుగుతుంది. డీజీసీఏ తనిఖీ అనంతరం ఎన్ఓసీ రాగానే శిక్షణ ప్రారంభమవుతుంది.