పూరీలో వైభవంగా జగన్నాథుని బహుడా యాత్ర

పూరీ జగన్నాథుని బహుడా యాత్ర ఘనంగా మొదలైంది. ఎనిమిది రోజుల పాటు గుండీచ ఆలయంలో ఉన్న జగన్నాథుడు, బలభద్రుడు, సుభద్రాదేవి తిరిగి 12వ శతాబ్దపు జగన్నాథ ఆలయానికి బయలుదేరారు.

ఉదయం 11 గంటలకు గోటి పహాండి ప్రక్రియ జరిగింది. మధ్యాహ్నం 2:30 తర్వాత పూరి గజపతి మహారాజ దివ్య సింగ్ దేవ్ రథాలపై బంగారు చీపురుతో చేరా పహరాన క్రతువు నిర్వహించారు. సాయంత్రం 4 గంటలకు భక్తులు రథాల తాళ్లు లాగడం ప్రారంభించారు. దర్పదలన్, తాలధ్వజ, నందిఘోష్ రథాలు ‘జై జగన్నాథ, హరిబోల్’ నామస్మరణలతో ముందుకు సాగాయి. లక్షలాది మంది భక్తులు ఈ శోభయాత్రను తిలకించేందుకు పూరీ వీధుల్లో గుమిగూడారు.

భద్రతా ఏర్పాట్లు కట్టుదిట్టంగా ఉన్నాయి. సిఆర్పిఎఫ్ బలగాలతో కలిపి 13,000 మందికి పైగా సిబ్బందిని మోహరించారు. 400కి పైగా ఎఐ కెమెరాలతో రద్దీని పర్యవేక్షిస్తున్నారు.