పూరీ జగన్నాథ రథయాత్రలో సునావేషం: బంగారు ఆభరణాలతో దేవతామూర్తుల దివ్య దర్శనం

శ్రీ జగన్నాథుని బహుదా యాత్ర పూర్తయింది. ముగ్గురు దేవతామూర్తుల రథాలు శ్రీక్షేత్రం ప్రధాన ద్వారం వద్దకు చేరుకున్నాయి.

ఆషాడ మాసం శుక్లపక్ష ఏకాదశి నాడు నిర్వహించే సునావేష వేడుకలో భాగంగా జగన్నాథుడు, బలభద్రుడు, సుభద్రాదేవిలను బంగారు కిరీటాలు, హారాలు, నడుము పట్టీలు వంటి విలువైన ఆభరణాలతో అలంకరించారు. రాజసభకు చెందిన బంగారు ఆభరణాలు ధరించిన దేవతామూర్తులు రథాలపై నుండే భక్తులకు దర్శనమిచ్చారు. దీనినే రాజరాజేశ్వర వేష అని కూడా పిలుస్తారు.

సంవత్సరంలో ఐదుసార్లు నిర్వహించే సునావేష ఉత్సవాల్లో రథాలపై జరిగే ఈ ఘట్టం అత్యంత ప్రాచుర్యం పొందింది. ఈ దివ్య దృశ్యాన్ని సందర్శించేందుకు దేశ విదేశాల నుంచి లక్షలాది మంది భక్తులు పూరీ బడాదండా వద్దకు తరలి వచ్చారు. నిన్నటి బహుదా యాత్రలో పాల్గొన్న భక్తులు స్వామి దర్శనంతో తన్మయులయ్యారు.