భారత్‌పై పుతిన్ ప్రశంసలు: విశ్వసనీయ భాగస్వామి అని కొనియాడిన రష్యా అధ్యక్షుడు

మాస్కో: రష్యా అధ్యక్షుడు వ్లాదిమిర్ పుతిన్ భారతదేశాన్ని "చాలా విశ్వసనీయ భాగస్వామి"గా అభివర్ణించారు. సెప్టెంబర్‌లో జరగనున్న బ్రిక్స్ శిఖరాగ్ర సమావేశానికి ముందు ఆయన ఈ వ్యాఖ్యలు చేశారు. భారత్ అత్యధిక ఆర్థిక వృద్ధి రేటు కలిగిన ప్రపంచ ఆర్థిక వ్యవస్థల్లో ఒకటని, ప్రధాని నరేంద్ర మోదీ నాయకత్వంలో ఈ పురోగతి సాధ్యమైందని పుతిన్ కొనియాడారు. 1947లో సోవియట్ యూనియన్‌తో దౌత్య సంబంధాలు ఏర్పడినప్పటి నుంచి ఇరు దేశాల మధ్య ప్రత్యేక వ్యూహాత్మక భాగస్వామ్యం కొనసాగుతోందని గుర్తు చేశారు. ప్రస్తుతం ద్వైపాక్షిక వాణిజ్యం 58-60 బిలియన్ డాలర్లుగా ఉందని, రాబోయే సంవత్సరాల్లో 100 బిలియన్ డాలర్లకు చేర్చాలని లక్ష్యంగా పెట్టుకున్నామని తెలిపారు. భారత్‌లో అతిపెద్ద పెట్టుబడి ప్రాజెక్టుల్లో ఒకటిగా ఉన్న కూడంకుళం అణు విద్యుత్ కేంద్రం నిర్మాణం కొనసాగుతోందని, ఇంధనం, హైడ్రోకార్బన్లు, ఫార్మా రంగాల్లో సహకారం విస్తరిస్తామని వివరించారు. భారత్-అమెరికా సన్నిహిత్యం రష్యాతో సంబంధాలకు ఆటంకంగా మారుతుందన్న విమర్శలను పుతిన్ తోసిపుచ్చారు. భారత్‌పై ఒత్తిడి తీసుకురావడం అంతర్జాతీయ సంబంధాలకు హానికరమని, ప్రపంచంలో అత్యధిక జనాభా కలిగిన దేశంపై అలాంటి ప్రయత్నాలు పనిచేయవని హెచ్చరించారు. ఈ సందర్భంగా ఆయన భారత్‌ను విశ్వసనీయ భాగస్వామిగా చూస్తున్నామని, సంబంధాలను మరింత బలోపేతం చేస్తామని ధృవీకరించారు.