పుతిన్-జిన్‌పింగ్ బహుధ్రువ ప్రపంచ ప్రకటనపై సంతకాలు

రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్‌పింగ్ బీజింగ్‌లో సమావేశమయ్యారు. ఇరువురు నేతలు బహుధ్రువ ప్రపంచ ప్రకటనపై సంతకాలు చేశారు. వాణిజ్యం, సాంకేతికత సహా వివిధ రంగాల్లో 20 ద్వైపాక్షిక ఒప్పందాలను కుదుర్చుకున్నారు.

ఈ నెల 19న పుతిన్ చైనా చేరుకున్నారు. ముందుగా ఇరు దేశాల అధ్యక్షులు ద్వైపాక్షిక చర్చలు జరిపారు. తర్వాత భౌగోళిక రాజకీయాలు, పశ్చిమాసియా సంక్షోభంపై చర్చించారు.

ఏ ఒక్క దేశం ప్రపంచ వ్యవహారాలను ఏకపక్షంగా నిర్ణయించరాదని ఇరువురు నేతలు పేర్కొన్నారు. ప్రపంచం బహుధ్రువంగా ఉండాలని, దీర్ఘకాలం కలిసి పని చేస్తామని వారు ప్రకటించారు.

తైవాన్ విషయంలో పుతిన్ ఒకే చైనా విధానానికి మద్దతు ప్రకటించారు. తైవాన్ స్వతంత్రతను ఏ రూపంలోనూ అంగీకరించేది లేదని స్పష్టం చేశారు.

ఇరాన్‌పై జరుగుతున్న దాడులు అక్రమమని, పశ్చిమాసియా స్థిరత్వాన్ని దెబ్బతీస్తున్నాయని ఇరువురు నేతలు పేర్కొన్నారు. హర్ముజ్ జలసంధిలో జరుగుతున్న దిగ్బంధనం ప్రపంచ వాణిజ్యానికి ముప్పుగా మారిందని హెచ్చరించారు. తక్షణమే దాడులు నిలిపి శాంతి చర్చలు జరపాలని పిలుపునిచ్చారు.

ట్రంప్ ప్రతిపాదించిన Golden Dome ప్రాజెక్టు అంతర్జాతీయ భద్రతకు హాని చేస్తుందని ఇరువురు నేతలు తప్పుపట్టారు. పర్యటన ముగించుకొని పుతిన్ రష్యా తిరిగి వెళ్ళారు.