తెలుగు సినిమాపై రాధిక ఆప్టే వ్యాఖ్యలు: నిర్మాత SKN తీవ్ర స్పందన

తెలుగు చిత్ర పరిశ్రమపై నటి రాధిక ఆప్టే చేసిన వ్యాఖ్యలపై నిర్మాత SKN స్పందించారు. ఆమె వ్యాఖ్యలను ఆయన తీవ్రంగా ఖండించారు. సోషల్ మీడియాలో పోస్ట్ చేసి తన అభిప్రాయాన్ని తెలియజేశారు.

ఇటీవల ఒక ఇంటర్వ్యూలో రాధిక ఆప్టే తెలుగు సినిమా పరిశ్రమను పురుషాధిక్య పరిశ్రమగా అభివర్ణించారు. వయసు పైబడిన హీరోల సరసన నటించాల్సి రావడం తనకు ఇబ్బందిగా అనిపించిందని ఆమె చెప్పారు. సెట్స్‌లో padding వాడాలని సూచించడం కూడా అసౌకర్యంగా అనిపించిందని తెలిపారు. స్థానిక నటీమణులకు అవకాశాలు ఇవ్వకుండా, తెల్లటి చర్మం ఉందనే కారణంతో ఉత్తరాది హీరోయిన్లను ఎంపిక చేస్తారని కూడా ఆమె విమర్శించారు. ఈ వ్యాఖ్యలపై సోషల్ మీడియాలో చర్చ జరిగింది.

ఈ నేపథ్యంలో SKN మాట్లాడుతూ, దక్షిణాది చిత్ర పరిశ్రమలో అవకాశాలు పొంది గుర్తింపు తెచ్చుకున్న తర్వాత ఆ పరిశ్రమను కించపరిచేలా మాట్లాడడం బాధాకరమని అన్నారు. ఇక్కడి కథలు, సంస్కృతిని తక్కువ చేసి చూపడం సరైంది కాదని ఆయన అభిప్రాయపడ్డారు. ప్రతి నటుడికి తన అభిప్రాయాన్ని వ్యక్తం చేసే స్వేచ్ఛ ఉందని ఆయన తెలిపారు. కానీ నిర్మాణాత్మక విమర్శకు, పరిశ్రమను తక్కువ చేసి చూపడానికి మధ్య చాలా తేడా ఉందని స్పష్టం చేశారు.

తెలుగు, దక్షిణాది చిత్ర పరిశ్రమలకు ప్రత్యేక సాంస్కృతిక గుర్తింపు, కథా విలువలు ఉన్నాయని SKN వివరించారు. ఒక ప్రాంతానికి చెందిన వారికి సహజంగా అనిపించే విషయాలు మరో ప్రాంతం వారికి భిన్నంగా కనిపించవచ్చని చెప్పారు. అందుకే పరస్పర గౌరవం అవసరమని ఆయన అన్నారు. నిర్మాణాత్మక విమర్శలను ఎప్పుడూ స్వాగతిస్తామని, కానీ సాంస్కృతిక ఆధిపత్య ధోరణిని అంగీకరించలేమని తెలిపారు.

SKN పోస్టుకు కొందరు తెలుగు సినీ అభిమానులు మద్దతు తెలుపుతున్నారు. మరికొందరు నెటిజన్లు మాత్రం ఆయన గత వ్యాఖ్యలను బయటకు తీసుకొచ్చి ఆయన్ని కూడా ట్రోల్ చేస్తున్నారు. గతంలోనూ తాప్సీ పన్ను, పూజా హెగ్డే, జాన్వీ కపూర్ వంటి నటీమణులు దక్షిణాది సినిమాలపై చేసిన వ్యాఖ్యలు వివాదాస్పదమయ్యాయి.