అధిక దిగుబడినిచ్చే రాగి రకాలు — సాగు విధానాలు, లాభాల వివరాలు

రాగి సాగు ఇప్పుడు రైతులకు లాభసాటిగా మారుతోంది. ఎకరానికి 16 నుండి 18 క్వింటాళ్ల దిగుబడి ఇచ్చే కొత్త రకాలు అందుబాటులోకి వచ్చాయి. మార్కెట్లో క్వింటాల్ ₹3,150కి పలుకుతోంది. ఖర్చులు పోను ఎకరానికి ₹40,000 వరకు నికర లాభం వస్తుందని పెరుమాళ్ళపల్లె ప్రాంతీయ వ్యవసాయ పరిశోధన స్థానం శాస్త్రవేత్త డాక్టర్ మాధవీలత తెలిపారు.

రాగిని ప్రధానంగా తెలంగాణ, ఉత్తరాంధ్ర, రాయలసీమ జిల్లాల్లో సాగు చేస్తున్నారు. ఖరీఫ్ పంటగా జూలై మొదటి వారం నుండి ఆగస్టు చివరి వారం వరకు విత్తుకోవచ్చు. వర్షాధారంగా లేదా నీటి పారుదల కింద కూడా సాగు చేయవచ్చు.

పెరుమాళ్ళపల్లె స్టేషన్ రెండు కొత్త రకాలను విడుదల చేసింది. మొదటిది 'వకుల' రకం. ఇది 95–100 రోజుల్లో కోతకు వస్తుంది. నీటి పారుదల కింద ఎకరానికి 15–16 క్వింటాళ్ళు వస్తాయి. వర్షాధారంగా 10–12 క్వింటాళ్ళు వస్తాయి. ఈ రకం అగ్గి తెగులు తట్టుకుంటుంది. గాలికి పడిపోదు.

రెండవది 'తిరుమల' రకం. దీని పంటకాలం 120–125 రోజులు. గింజ దిగుబడితో పాటు చొప్ప దిగుబడి కూడా అధికంగా వస్తుంది. ఎకరానికి 15–17 క్వింటాళ్ళ దిగుబడి వస్తుంది. ఈ రకానికి విత్తనాల కోసం పెరుమాళ్ళపల్లె స్టేషన్‌కు నేరుగా వెళ్ళవచ్చు.

నేరుగా వెదజల్లే పద్ధతిలో ఎకరానికి 4 కిలోల విత్తనం సరిపోతుంది. నారు నాటే పద్ధతిలో 2.5 కిలోలు సరిపోతాయి. 18–21 రోజుల వయసు నారుని ప్రధాన పొలంలో నాటాలి.

ఎరువుల విషయంలో ఎకరాకు 4 టన్నుల పశువుల ఎరువు వేయాలి. నాటే సమయంలో 25 కిలోల యూరియా, 50 కిలోల సూపర్ ఫాస్ఫేట్, 15 కిలోల పొటాష్ వేయాలి. నాటిన 30 రోజుల తర్వాత మరో 25 కిలోల యూరియా వేయాలి. ఎకరానికి పెట్టుబడి ₹10,000–₹15,000 అవుతుంది.

కలుపు నివారణ కోసం విత్తిన 20–25 రోజుల తర్వాత కూలీలతో కలుపు తీయించాలి. నారు నాటిన 20–30 రోజుల తర్వాత దంతితో అంతర్ కృషి చేయాలి.