సీబీఎస్ఈ జవాబు పత్రాలపై రాహుల్ గాంధీ ఆవేదన: విద్యార్థులను యాంటీనేషనల్‌గా ముద్రవేయడం ఆమోదయోగ్యం కాదు

కేంద్ర మాధ్యమిక విద్యా మండలి (సీబీఎస్ఈ) సమాధాన పత్రాల వివాదంపై కాంగ్రెస్ నేత రాహుల్ గాంధీ చేసిన సోషల్ మీడియా పోస్ట్ దేశవ్యాప్తంగా చర్చనీయాంశమైంది. ఓ విద్యార్థి తన సీబీఎస్ఈ అన్‌సర్ షీట్ ఫొటోకాపీలో తన చేతిరాత కాకుండా వేరే చేతిరాత ఉందంటూ ఎక్స్ (ట్విట్టర్)లో పోస్ట్ చేయడంతో ఈ వివాదం మొదలైంది. దీనికి జనం నుంచి మద్దతు పెరగడంతో, విద్యార్థులను ‘డీప్ స్టేట్ ఏజెంట్లు’, ‘సోరోస్’, ‘పాకిస్తానీ’ అంటూ కొందరు నెటిజన్లు ట్రోల్ చేశారు.

ఈ నేపథ్యంలో రాహుల్ గాంధీ స్పందిస్తూ, ‘17 ఏళ్ల విద్యార్థులను డీప్ స్టేట్ ఏజెంట్లుగా పిలవడం హాస్యాస్పదం. వారు కేవలం తమ జవాబు పత్రాలు కావలని అడిగారు. దీంతో ఒక్కసారిగా వాళ్లు యాంటీ నేషనల్‌గా, సోరోసిస్ట్‌గా, పాకిస్తానీగా ముద్ర వేయబడటం సరికాదు’ అని వ్యాఖ్యానించారు.

‘సమస్యను ఒప్పుకుని పరిష్కరించుకునే బదులు, విద్యార్థుల జేబుల్లో డబ్బు వెళ్తోందని నిందిస్తూ, వారిని దేశద్రోహులుగా చూపించడం సరికాదు’ అని ఆయన పేర్కొన్నారు. సీబీఎస్ఈ విధానం ప్రకారం, సమాధాన పత్రాల ఫొటోకాపీ, పునర్మూల్యాంకనం కోసం విద్యార్థులు దరఖాస్తు చేసుకోవచ్చు. ఇది వారి చట్టబద్ధమైన హక్కు. అయితే ఈ ప్రక్రియలో లోపాలు వెలుగులోకి రావడం, ఆ తర్వాత విద్యార్థులపై ట్రోలింగ్ జరగడం వివాదాన్ని మరింత పెంచింది.

రాహుల్ గాంధీ పోస్ట్‌పై సోషల్ మీడియాలో భిన్న స్పందనలు వ్యక్తమవుతున్నాయి. కొందరు అభిమానులు ఆయన వ్యాఖ్యలను సమర్థిస్తుండగా, మరికొందరు దీనిని రాజకీయ చొరవగా చూస్తున్నారు. ఈ వివాదంపై సీబీఎస్ఈ లేదా కేంద్ర ప్రభుత్వం ఇంకా అధికారికంగా స్పందించలేదు.