కర్ణాటక సీఎం మార్పుపై రాహుల్‌తో సిద్ధారామయ్య, డీకే భేటీ

కర్ణాటక సీఎం సిద్ధారామయ్య, డిప్యూటీ సీఎం డీకే శివకుమార్‌లను కాంగ్రెస్ హై కమాండ్ ఢిల్లీకి పిలిపించింది. ఉదయం 11 గంటలకు వారు వేర్వేరుగా కాంగ్రెస్ నాయకత్వంతో భేటీ అవుతారని తెలుస్తోంది.

భేటీకి ముందు సిద్ధారామయ్య మాట్లాడుతూ, ఏ అంశంపై చర్చ జరగనుందో తనకు తెలియదని పేర్కొన్నారు. ఆయన క్యాబినెట్ సహచరులు, సన్నిహితులతో కలిసి రాత్రే ఢిల్లీ చేరుకున్నారు.

నాలుగు రాష్ట్రాల అసెంబ్లీ ఎన్నికలు ముగిసిన వెంటనే కర్ణాటకలో సీఎం మార్పు అంశం మళ్లీ తెరపైకి వచ్చింది. 2023 అసెంబ్లీ ఎన్నికల్లో కాంగ్రెస్ గెలిచిన తర్వాత సీఎం పదవి కోసం సిద్ధారామయ్య, డీకే శివకుమార్ మధ్య పోటీ నెలకొంది. చెరో రెండున్నర ఏళ్లు సీఎంగా ఉండాలని హామీ ఇచ్చినట్లు శివకుమార్ వర్గం పేర్కొంటోంది.

గత నవంబర్‌లో ప్రభుత్వం రెండున్నర ఏళ్లు పూర్తయిన సందర్భంగా ఈ అంశం మొదటిసారి తీవ్రమైంది. అప్పట్లో ఇరు వర్గాలతో కాంగ్రెస్ పలు సమావేశాలు నిర్వహించింది. సిద్ధారామయ్య, డీకే శివకుమార్ మధ్య breakfast భేటీలు జరిపించడం ద్వారా ఆ సంక్షోభాన్ని తాత్కాలికంగా వాయిదా వేయగలిగింది.

ఈ భేటీ తర్వాత నాయకత్వంపై స్పష్టత వస్తుందా అనేది వేచి చూడాల్సి ఉంది. ఈ విషయంపై కాంగ్రెస్ అధికారిక ప్రకటన రావాల్సి ఉంది.