దేశంలో ఆర్థిక సునామీ, అంతర్గత తిరుగుబాటు, మోదీ ఏడాదిలో ప్రధాని కాకపోవచ్చు: రాహుల్ గాంధీ హెచ్చరిక

ప్రతిపక్ష నేత రాహుల్‌గాంధీ దేశ ఆర్థిక పరిస్థితిపై తీవ్ర విమర్శలు చేశారు. త్వరలోనే దేశంలో భారీ ఆర్థిక సంక్షోభం (ఆయన మాటల్లో 'ఎకనామిక్ సునామీ') వస్తుందని, ఇది అంతర్గత తిరుగుబాటుకు దారితీస్తుందని హెచ్చరించారు. అంతేకాక, ఒక ఏడాది లోపే ప్రధాని మోదీ పదవిలో ఉండకపోవచ్చని ఆయన అంచనా వేశారు.

ఓ కార్యక్రమంలో మాట్లాడిన రాహుల్ గాంధీ, ప్రస్తుతం దేశంలోని సంస్థాగత వ్యవస్థలు - ప్రధాన ఎన్నికల కమిషనర్, ఇంటెలిజెన్స్ చీఫ్, సీనియర్ న్యాయవ్యవస్థ - ప్రభుత్వంపై తిరుగుబాటు చేస్తూ తనకు సమాచారం అందిస్తున్నాయని ఆరోపించారు. 'నియంత్రణ వ్యవస్థ కుప్పకూలిపోతోంది' అని ఆయన పేర్కొన్నారు. మోదీ, షా, మంత్రులు, అజిత్ దోవాల్ గురించి పూర్తి సమాచారం తమ వ్యవస్థ నుంచే వస్తోందని చెప్పారు.

తాను ఇప్పటివరకు చూడని రీతిలో ఆర్థిక సంక్షోభం వస్తుందని, దాన్ని ఎవరూ ఆపలేరని రాహుల్ గాంధీ స్పష్టం చేశారు. ప్రజా ఆగ్రహాన్ని అణిచేందుకు ప్రభుత్వం ఎమర్జెన్సీ లాంటి చర్యలు తీసుకోవచ్చని కూడా ఆయన హెచ్చరించారు. దేశం ఇప్పుడు 'అదుపు తప్పిన' దశలోకి వెళ్తోందని వివరించారు.

'ఒక ఏడాదిలో మోదీ జీ ప్రధాన మంత్రిగా ఉండరు' అని రాహుల్ గాంధీ ధీమాగా చెప్పారు. ఈ వ్యాఖ్యలపై బీజేపీ నుంచి ఇంకా స్పందన రాలేదు.