రాయిదుర్గం భూముల వివాదం: తెలంగాణ ప్రభుత్వం SBI తో తెగదింపులకు సిద్ధమవుతుందా?

హైదరాబాద్ రాయిదుర్గం నాలెడ్జ్ సిటీలోని సర్వే నంబర్ 83/1 లో ఉన్న ఆరు ఎకరాల తొమ్మిది గుంటల భూమిని TGIC పబ్లిక్ వేలం ద్వారా విక్రయించింది. ఆ వేలంలో గౌరవ వెంచర్స్ అనే రియల్ ఎస్టేట్ సంస్థ ఒక్క ఎకరాన్ని 237 కోట్ల రూపాయలకు దక్కించుకొని దేశవ్యాప్తంగా సరికొత్త రికార్డు నమోదు చేసింది. అయితే వేలం జరిగిన తర్వాత ఆ భూమిలో ఐదు ఎకరాలు తమదేనని SBI హైకోర్టులో వ్యాజ్యం వేయడం తీవ్ర వివాదానికి దారితీసింది. న్యాయస్థానం మూడు వారాల పాటు స్టే విధించడంతో ఈ అంశం రాష్ట్రవ్యాప్తంగా చర్చకు దారితీసింది.

తెలంగాణ ప్రభుత్వం SBI తీరుపై తీవ్ర అసంతృప్తిని వ్యక్తం చేస్తోంది. భూ కేటాయింపు నిబంధనల ప్రకారం నిర్ణీత కాలంలో నిర్మాణాలు చేపట్టకుండా SBI నిబంధనలను ఉల్లంఘించిందని ప్రభుత్వం ఆరోపిస్తోంది. వేలం పూర్తయిన తర్వాత కోర్టుకు వెళ్ళడం ప్రభుత్వ ప్రతిష్టకు భంగం కలిగించిందని భావిస్తోంది. దీంతో SBI తో ఆర్థిక సంబంధాలను పునర్ సమీక్షించాలని ప్రభుత్వం యోచిస్తోంది. వివిధ ప్రభుత్వ శాఖల బ్యాంకు ఖాతాలను SBI నుంచి ఇతర బ్యాంకులకు మార్చే అంశాన్ని పరిశీలిస్తోంది. అలాగే SBI లో ఉన్న ప్రభుత్వ డిపాజిట్లు మరియు నిధులను వెనక్కి తీసుకోవాలని సైతం భావిస్తున్నట్టు తెలుస్తోంది.

మరోవైపు SBI కూడా తన వాదనను బలంగా వినిపిస్తోంది. 2010 లో ఉమ్మడి ఆంధ్రప్రదేశ్ ప్రభుత్వ హయాంలో 13.33 కోట్ల రూపాయలు చెల్లించి ఐదు ఎకరాల భూమిని కొనుగోలు చేశామని వివరించింది. ఆ ఒప్పందంలో భూమిని తిరిగి స్వాధీనం చేసుకునే నిబంధనలేవీ లేవని స్పష్టం చేసింది. బ్యాంకుల విలీనం, COVID మహమ్మారి, అనుమతుల ఆలస్యం కారణంగా ట్విన్ టవర్స్ నిర్మాణం వాయిదా పడిందని కోర్టుకు విన్నవించింది.

వేలం అంగీకరించిన SBI ఆకస్మాత్తుగా కోర్టుకు వెళ్ళడం వెనుక రాజకీయ కుట్ర ఏమైనా ఉందా అన్న కోణంలో ప్రభుత్వం దర్యాప్తు చేయనుందని తెలుస్తోంది. మూడు వారాల స్టే తర్వాత న్యాయస్థానం ఏం నిర్ణయం తీసుకుంటుందన్నది అందరి దృష్టిని ఆకర్షిస్తోంది.