రాజమండ్రి డాక్టర్ ప్రియాంక కేసులో పోలీసుల దర్యాప్తుపై న్యాయవాది ఆరోపణలు

రాజమండ్రిలో డాక్టర్ ప్రియాంక మృతి కేసులో పోలీసుల దర్యాప్తుపై న్యాయవాది ముప్పాల సుబ్బారావు ఆరోపణలు చేశారు. తొలుత 125బి సెక్షన్ కింద కేసు నమోదు చేసిన పోలీసులు, తర్వాత తీవ్రత దృష్ట్యా సెక్షన్ 110 (కల్పబుల్ హోమిసైడ్ అమౌంటింగ్ టు మర్డర్) చేర్చారని, ఇందులో 7 సంవత్సరాల వరకు శిక్ష పడే అవకాశం ఉందని ఆయన తెలిపారు.

నిందితుల ప్రవర్తనపై అనుమానాలు ఉన్నా, వారిని పోలీసు కస్టడీకి తీసుకుని విచారించేందుకు ఎందుకు ప్రయత్నించలేదని సుబ్బారావు ప్రశ్నించారు. ఘటన జరిగిన రోజు నిందితులకు వైద్య పరీక్షలు నిర్వహించి ఉంటే, మద్యం, గంజాయి లేదా ఇతర డ్రగ్స్ సేవించారా అనేది తేలేదన్నారు. కేసు బయటకు రావడంలో జాప్యం, పోలీసులకు సమాచారం ఎప్పుడు అందింది, కేసు నమోదు ఆలస్యం జరిగిందా అనే అంశాలపై సమగ్ర విచారణ చేపట్టాలని డిమాండ్ చేశారు.

నిందితులు డాక్టర్ ప్రియాంక స్కూటర్‌ని ఉద్దేశపూర్వకంగా ఢీ కొన్నారని, వారి వద్ద ఉన్న కారుకు నంబర్ ప్లేట్ లేదని, ఘటన అనంతరం పారిపోయారని న్యాయవాది ఆరోపించారు. నిందితుల వెనుక ఎవరైనా ఉన్నారా అనే కోణంలో కూడా దర్యాప్తు జరగాలన్నారు. ఈ నేపథ్యంలో GSL మెడికల్ కాలేజీ విద్యార్థులు నిరసన వ్యక్తం చేశారు.