రాజమండ్రి మెడికో ప్రియాంక మృతి: సీఎం చంద్రబాబు షాక్, నిందితులపై కఠిన చర్యలు

రాజమహేంద్రవరంలో మద్యం మత్తులో కారు నడిపిన ఇద్దరు యువకుల దాడిలో గాయపడిన వైద్య విద్యార్థిని ప్రియాంక (21) మృతి చెందింది. ఆమె సికింద్రాబాద్ కిమ్స్ హాస్పిటల్‌లో చికిత్స పొందుతూ ఆదివారం మధ్యాహ్నం 3.32 గంటలకు తుదిశ్వాస విడిచినట్లు వైద్యులు ధృవీకరించారు.

ప్రియాంక తూర్పు గోదావరి జిల్లా రాజనగరంలోని GSL వైద్య కళాశాలలో PG మొదటి సంవత్సరం డెర్మటాలజీ చదువుతోంది. ఈ నెల 3వ తేదీ రాత్రి ఆమె స్నేహితుడితో కలిసి స్కూటీపై రాజమండ్రిలోని ప్రసాద్ ఆదిత్య మాల్ వద్ద ఉండగా, లాలాచెరువుకు చెందిన సురవరపు దశవంత్, జోసెఫ్ ఎడ్వర్డ్స్ అనే ఇద్దరు మద్యం మత్తులో అతివేగంగా కారు నడిపి స్కూటీని రెండుసార్లు ఢీకొట్టారు. కారు ప్రియాంకపై నుండి వెళ్లడంతో ఆమె తలకు తీవ్ర గాయం కాగా అపస్మారక స్థితిలోకి వెళ్లింది.

స్థానికంగా ప్రాథమిక చికిత్స అనంతరం మెరుగైన వైద్యం కోసం సికింద్రాబాద్ కిమ్స్‌కు తరలించినా వైద్య ప్రయత్నాలు ఫలించలేదు. రాజమండ్రి పోలీసులు తొలుత హత్యాయత్నం కింద కేసు నమోదు చేసి, మరణం తర్వాత BNS సెక్షన్ 106 ప్రకారం హత్య కేసుగా మార్చారు. నిందితులు ఇప్పటికే అరెస్టు కాగా, ఈ నెల 21 వరకు రిమాండ్ విధించారు.

ఈ ఘటనపై ముఖ్యమంత్రి చంద్రబాబు నాయుడు దిగ్భ్రాంతి వ్యక్తం చేశారు. ఆదివారం తూర్పు గోదావరి జిల్లా కలెక్టర్, ఎస్పీతో టెలీ కాన్ఫరెన్స్‌లో మాట్లాడి, ప్రియాంక కుటుంబానికి రూ.20 లక్షల ఆర్థిక సాయం ప్రకటించారు. అన్ని విధాలా అండగా ఉండడంతో పాటు నిందితులకు కఠిన శిక్ష పడేలా చర్యలు తీసుకోవాలని అధికారులను ఆదేశించారు.

ప్రియాంక తండ్రి వెంకటేశ్వరులు మీడియాతో మాట్లాడుతూ, ప్రభుత్వం తరఫున ఎవరూ ఫోన్ చేయకపోవడం, ఆస్పత్రికి రాకపోవడం పట్ల తీవ్ర ఆవేదన వ్యక్తం చేశారు. ఇదిలా ఉండగా, మాజీ ఎంపీ మార్గాని భరత్ నిందితులకు కఠిన శిక్షలు డిమాండ్ చేస్తూ సోమవారం రాజమండ్రిలో బంద్‌కు పిలుపునిచ్చారు. ఈ ఘటనపై రాష్ట్రవ్యాప్తంగా ఆగ్రహం వ్యక్తమవుతోంది. నిందితుల కస్టడీ రిమాండ్ కొనసాగుతుండగా, పోలీసు దర్యాప్తు ముమ్మరం చేశారు.