రాజమండ్రిలో మెడికో ప్రియాంకపై దాడి: నిందితులపై కఠిన చర్యలు కోరుతూ విద్యార్థుల నిరసన

రాజమండ్రిలో ప్రసాద్ మాల్ వద్ద మార్చి 3న ఘటనలో మెడికో విద్యార్థిని ప్రియాంక తీవ్రంగా గాయపడింది. ఇద్దరు యువకులు మద్యం సేవించి డ్రైవింగ్ చేస్తూ ఆమె స్కూటీని ఢీకొట్టి, ఆపై కారుతో ఢీకొట్టినట్లు స్థానికులు తెలిపారు.

ప్రియాంక స్కూటీపై మాల్ నుంచి బయటకు వస్తుండగా ఆ యువకులు వాహనంతో ముందు రెండుసార్లు ఢీకొట్టారు. అనంతరం ఆమె స్కూటీ కింద పడిపోగా కారును ఆమెపైకి ఎక్కించినట్లు ప్రత్యక్ష సాక్షులు తెలిపారు. ఈ ఘటనలో ప్రియాంక తీవ్రమైన గాయాలతో ఆసుపత్రిలో చికిత్స పొందుతోంది.

ప్రియాంక స్థానిక జీఎస్ఎల్ మెడికల్ కాలేజీలో చదువుతోంది. ఘటన తర్వాత విద్యార్థులు రాజమండ్రిలో నిరసన ప్రదర్శించారు. నిందితులపై కఠిన చర్యలు తీసుకోవాలని, మాల్ వద్ద భద్రతా సిబ్బందిని నియమించాలని డిమాండ్ చేశారు. రోడ్లపై భద్రత లేకపోవడంతో బయటికి వెళ్లాలంటేనే భయంగా ఉందని విద్యార్థులు వాపోయారు.

పోలీసులు ఇద్దరు నిందితులను అదుపులోకి తీసుకుని విచారిస్తున్నారు. కేసు నమోదు చేసి దర్యాప్తు కొనసాగిస్తున్నామని అధికారులు తెలిపారు.