రాజమండ్రి: మత్తులో కారు ఢీకొనడంతో వైద్య విద్యార్థిని ప్రియాంక బ్రెయిన్ డెడ్

ఈ నెల 3న రాజమండ్రి నగరంలోని ఏవి అప్పారావు రోడ్డులోని ప్రసాద్ ఆదిత్య షాపింగ్ మాల్ వద్ద ఈ ఘటన జరిగింది. మద్యం మత్తులో ఉన్న ఇద్దరు వ్యక్తులు కారులో వచ్చి సినిమా చూసేందుకు వెళ్లగా, సిబ్బంది లోపలికి అనుమతించలేదు. కోపంతో బయటకు వచ్చిన నిందితులు కారును అతివేగంగా నడిపి మాల్ ఎక్సిట్ గేట్ వద్ద స్కూటీపై వెళ్తున్న ఇద్దరు వైద్య విద్యార్థులను బలంగా ఢీకొట్టారు.

స్కూటీపై ఉన్న ప్రియాంక (పీజీ వైద్య విద్యార్థిని), ఉమేశ్ (మరో వైద్య విద్యార్థి) కిందపడిపోయినా, నిందితుడు కారును ఆపకుండా మళ్లీ మళ్లీ ఢీకొట్టి, వారి మీద నుంచి పోనిచ్చాడు. ఈ దృశ్యాలు మాల్లోని సీసీటీవీ కెమెరాల్లో రికార్డయ్యాయి. ప్రమాదంలో ప్రియాంక తలకు తీవ్ర గాయమైంది. ప్రస్తుతం ఆమె హైదరాబాద్ లోని కిమ్స్ ఆస్పత్రిలో వెంటిలేటర్‌పై చికిత్స పొందుతోంది. బ్రెయిన్ డెడ్ స్థితిలో ఉన్నట్లు వైద్యులు వెల్లడించారు. ఉమేశ్ చికిత్స కొనసాగుతోంది.

ఈ కేసులో నిందితులిద్దరినీ పోలీసులు అదుపులోకి తీసుకుని కోర్టులో హాజరుపరచగా, ఈ నెల 21 వరకు రిమాండ్ విధించారు. సీఎం చంద్రబాబు నాయుడు, డిప్యూటీ సీఎం పవన్ కల్యాణ్ ఈ ఘటనపై స్పందించారు. మత్తులో వాహనం నడిపేవారిపై కఠిన చర్యలు తీసుకోవాలని డీఐజీని ఆదేశించారు. ప్రియాంక ఆరోగ్యాన్ని నిరంతరం పర్యవేక్షించాలని అధికారులకు సూచించారు.

మాజీ ఎంపీ భరత్ ఈ ఘటనపై అనుమానాలు వ్యక్తం చేశారు. ఇది ప్రమాదం కాదని, హత్యాయత్నం కావచ్చునని అన్నారు. నిందితులపై సెక్షన్ 110 (కల్పబుల్ హోమిసైడ్ నాట్ అమౌంటింగ్ టు మర్డర్) మాత్రమే పెట్టడంపై ఆయన అభ్యంతరం వ్యక్తం చేశారు. కేసు విషయంలో పోలీసులు తీరుపై అనుమానం ఉందని, సమగ్ర విచారణ జరపాలని డిమాండ్ చేశారు.