రాజశ్రీ కోళ్ళ పెంపకంతో అధిక లాభాలు — పివిఎన్‌ఆర్ యూనివర్సిటీ నిపుణుల సూచనలు

రాజేంద్రనగర్‌లోని పివి నరసింహారావు వెటర్నరీ యూనివర్సిటీ పౌల్ట్రీ సైన్స్ విభాగం ప్రొఫెసర్ దైద కృష్ణ రాజశ్రీ కోళ్ళ పెంపకం గురించి వివరించారు. సాధారణ దేశవాళీ కోళ్ళతో పోల్చితే రాజశ్రీ కోళ్ళు తక్కువ సమయంలో అధిక గుడ్లు, మాంసం ఇస్తాయని ఆయన తెలిపారు.

ఒక రాజశ్రీ పెట్ట ఏడాదికి దాదాపు 140 గుడ్లు ఇస్తుందని, 20–22 వారాల వయసుకు గుడ్ల ఉత్పత్తి మొదలవుతుందని ప్రొఫెసర్ దైద కృష్ణ వివరించారు. గోధుమ రంగు గుడ్లకు గ్రామీణ ప్రాంతాల్లో మంచి గిరాకీ ఉందని కూడా చెప్పారు.

ఒక పెట్ట మీద అన్ని ఖర్చులు పోను నికర లాభం దాదాపు ₹550 వస్తుందని, పుంజు మీద ₹300 నుండి ₹350 వరకు లాభం వస్తుందని తెలిపారు. రాజశ్రీతో పాటు వనరాజ, గిరిరాజ, గ్రామప్రియ, శ్రీనిధి వంటి మెరుగైన జాతులను కూడా రైతులకు అందుబాటులోకి తెచ్చారు.

ICMR సిఫారసు ప్రకారం ఒక మనిషి సంవత్సరానికి 180 గుడ్లు, 11 kg మాంసం తినాలి. కానీ ప్రస్తుతం భారతదేశంలో సరాసరి వినియోగం 68 గుడ్లు, 4.4 kg మాంసం మాత్రమే ఉందని ఆయన పేర్కొన్నారు. ఈ లోటు పూరించడానికి రాజశ్రీ వంటి జాతులు ఉపయోగపడతాయని వివరించారు.

మొదటి ఆరు వారాలు brood house లో పెంచాలి. షెడ్ తూర్పు–పడమర దిశలో నిర్మించాలి. ఒక ఎకరా పరిసర ప్రాంతంలో 500 పక్షులు పెంచవచ్చని చెప్పారు.

రాజేంద్రనగర్ కోళ్ళ పరిశోధన సంస్థలో ఒక రోజు వయసు రాజశ్రీ కోడి పిల్ల ₹25కు లభిస్తుంది. మరిన్ని వివరాలకు 8309115040 కి సంప్రదించవచ్చు.