రాజధాని ఎక్స్‌ప్రెస్‌లో అగ్ని ప్రమాదం — 68 మంది ప్రయాణికులు సురక్షితం

తిరువనంతపురం నుంచి హజ్రత్ నిజాముద్దీన్ వెళ్తున్న రాజధాని ఎక్స్‌ప్రెస్‌లో అగ్ని ప్రమాదం సంభవించింది. మధ్యప్రదేశ్‌లో విక్రంగడ్-ఆలోట్ రైల్వే స్టేషన్ల మధ్య ఈ సంఘటన జరిగింది.

B1 కోచ్‌లో మంటలు చెలరేగాయి. రైల్వే సిబ్బంది వెంటనే స్పందించి ఆ కోచ్‌ను రైలు నుంచి వేరుచేశారు. కోచ్‌లో ఉన్న 68 మంది ప్రయాణికులను సురక్షితంగా బయటకు తీశారు.

ఎవరికీ గాయాలు కాలేదని, ప్రాణనష్టం జరగలేదని అధికారులు నిర్ధారించారు. మంటలు వ్యాప్తి చెందకుండా విద్యుత్ సరఫరా నిలిపివేశారు.

ఈ ఘటన వల్ల ఢిల్లీ-ముంబై లైన్‌లో రైళ్ల రాకపోకలు రెండున్నర గంటలు నిలిచిపోయాయి. వెస్ట్ సెంట్రల్ రైల్వే కోటా డివిజన్ అధికారులు త్వరలో రైల్వే సెక్షన్ పునరుద్ధరిస్తామని తెలిపారు. అగ్ని ప్రమాదానికి కారణాలపై దర్యాప్తు జరుపుతున్నట్లు రైల్వే శాఖ వెల్లడించింది.