రాజ్యసభ ఎన్నికల నోటిఫికేషన్ విడుదల; బీజేపీ సీట్ల కేటాయింపు కసరత్తు

రాజ్యసభ ఎన్నికల నోటిఫికేషన్ ఇవ్వాల విడుదల కానుంది. పది రాష్ట్రాల్లో 24 స్థానాలకు ఎన్నికలు జరగనున్నాయి. నామినేషన్లు జూన్ 8 వరకు స్వీకరించగా, పోలింగ్ జూన్ 18న జరుగుతుంది. అదే రోజు కౌంటింగ్ పూర్తి చేసి ఫలితాలు ప్రకటిస్తారు.

ఈ నేపథ్యంలో బీజేపీ సీట్ల కేటాయింపుపై కసరత్తు ప్రారంభించింది. బుధవారం ప్రధాని నివాసంలో బీజేపీ కేంద్ర ఎన్నికల కమిటీ సమావేశమైంది. ఎన్డీఏ భాగస్వామ్య పక్షాలతో సీట్ల పంపిణీపై చర్చించినట్లు తెలుస్తోంది.

మొత్తం 24 సీట్లలో 17 ఎన్డీఏ భాగస్వామ్య పక్షాలకు వెళ్లే అవకాశం ఉన్నట్లు సమాచారం. బీజేపీ 11 స్థానాల్లో తన అభ్యర్థులను నిలబెడుతుంది. అరుణాచల్ ప్రదేశ్, మణిపూర్, గుజరాత్, మధ్యప్రదేశ్, కర్ణాటక, రాజస్థాన్, జార్ఖండ్‌లలో సొంత బలంతో గెలిచే విశ్వాసం ఉన్నట్లు బీజేపీ భావిస్తోంది. మిగతా ఆరు సీట్లు మిత్రపక్షాలకు.

రాష్ట్రాల వారీగా: ఆంధ్రప్రదేశ్‌లో నాలుగు సీట్లలో టీడీపీకి మూడు, బీజేపీ లేదా జనసేనకు ఒక సీటు కేటాయించే అవకాశం ఉంది. గుజరాత్‌లో నాలుగు సీట్లూ బీజేపీకే. మధ్యప్రదేశ్‌లో మూడు సీట్లలో రెండు బీజేపీ గెలుచుకోగలదు. రాజస్థాన్‌లోనూ మూడింటిలో రెండు సీట్లు బీజేపీకి అనుకూలంగా ఉన్నాయి. మణిపూర్, అరుణాచల్‌లో ఒక్కో సీటు బీజేపీ గెలుస్తుందని ఆశిస్తోంది. మేఘాలయ సీటు ఎన్డీఏ భాగస్వామ్య పార్టీ నేషనల్ పీపుల్స్ పార్టీ (ఎన్‌పీపీ)కి దక్కనుంది. కర్ణాటకలో ఒక సీటు కోసం జనతాదళ్ (ఎస్) పట్టు పడుతోంది. మాజీ ప్రధాని హెచ్‌డి దేవెగౌడను రాజ్యసభకు రీనామినేట్ చేయాలని కోరుతోంది.

మహారాష్ట్రలో సునేత్ర పవార్ రాజీనామాతో ఖాళీ అయిన ఒక స్థానానికి ఉప ఎన్నిక జరుగుతుంది. నోటిఫికేషన్ వెలువడిన తర్వాత సీట్ల కేటాయింపు ఖరారయ్యే అవకాశం ఉంది.