రామాయణం సినిమా ప్రమోషన్‌కు రూ.375 కోట్లు – సోనీ పిక్చర్స్ భాగస్వామ్యం

దర్శకుడు నితేష్ తివారి రూపొందిస్తున్న ‘రామాయణం’ చిత్రం భారతీయ సినిమాలో అత్యంత ప్రతిష్టాత్మక ప్రాజెక్టుల్లో ఒకటి. రణ్బీర్ కపూర్ శ్రీరాముడిగా, సాయి పల్లవి సీతగా, యష్ రావణుడిగా నటిస్తున్న ఈ రెండు భాగాల మహాకావ్యం భారీ బడ్జెట్‌తో పాటు అంతర్జాతీయ ప్రచార వ్యూహంతో ముందుకెళ్తోంది.

తాజా నివేదికల ప్రకారం, సోనీ పిక్చర్స్ ఈ చిత్రానికి ప్రపంచ వ్యాప్తంగా పంపిణీ బాధ్యతలు తీసుకుంది. ఈ ఒప్పందం ద్వారా అంతర్జాతీయ ప్రేక్షకుల కోసం ప్రచార కార్యక్రమాలకు సోనీ 235 కోట్ల రూపాయలు వెచ్చించనుంది. నిర్మాతలు మరో 140 కోట్ల రూపాయలు జోడించడంతో మొత్తం ప్రమోషన్ బడ్జెట్ 375 కోట్ల రూపాయలకు చేరుతుందని సమాచారం.

భారతీయ చిత్రాల్లో ప్రచారం కోసం ఇంత పెద్ద మొత్తం కేటాయించడం అరుదు. ప్రపంచ వ్యాప్తంగా భారతీయ ఇతిహాసాన్ని ఉన్నత స్థాయిలో పరిచయం చేయడమే లక్ష్యంగా ఈ వ్యూహం రూపొందించినట్లు తెలుస్తోంది. అలాగే, ఈ చిత్రం ఇమాక్స్ ఫార్మాట్‌లో అత్యాధునిక విజువల్ ఎఫెక్ట్స్‌తో తెరకెక్కుతోంది. సంగీతాన్ని ఏ.ఆర్. రెహమాన్, హాన్స్ జిమ్మర్ కలిసి అందిస్తున్నారు.

ఇటీవల అభిమానులు ఎదురుచూస్తున్న ట్రైలర్ ఊహించని విధంగా వాయిదా పడింది. దీనికి కారణాలపై అధికారిక ప్రకటన రాలేదు. కొత్త విడుదల తేదీ త్వరలో ప్రకటించే అవకాశం ఉందని సినీ వర్గాలు చెప్తున్నాయి. గతంలో శాన్ డియాగో కామిక్-కాన్ వేదికపై ఈ చిత్రం ప్రత్యేక ఆకర్షణగా నిలిచింది.