రామాయణం ట్రైలర్ వాయిదా – సోనీ డిస్ట్రిబ్యూషన్ డీల్, ఢిల్లీ నిరసనలు కారణం

"రామాయణం" సినిమా ట్రైలర్ విడుదల వాయిదా పడింది. ఈ నెల 24న ట్రైలర్ రావాల్సి ఉండగా, చిత్ర బృందం తాజాగా ఈ నిర్ణయం ప్రకటించింది. ప్రపంచవ్యాప్తంగా సినిమా పంపిణీ హక్కులను సోనీ సంస్థకు ఇవ్వడంతో మార్కెటింగ్ ప్రణాళిక మారిందని, అలాగే ఢిల్లీలో కొనసాగుతున్న నిరసనల కారణంగా వాతావరణం అనుకూలంగా లేదని నిర్మాతలు చెబుతున్నారు.

ఈ చిత్రానికి నితీష్ తివారీ దర్శకత్వం వహిస్తున్నారు. రణ్‌బీర్ కపూర్ రాముడిగా, సాయి పల్లవి సీతగా, యష్ రావణుడిగా నటిస్తున్నారు. రూ.2000 కోట్ల భారీ బడ్జెట్‌తో ఈ సినిమాను రూపొందిస్తున్నారు. మొదటి భాగాన్ని ఈ ఏడాది దీపావళికి, రెండో భాగాన్ని 2027 దీపావళికి విడుదల చేయాలని నిర్మాతలు ప్రణాళిక వేశారు.

ట్రైలర్ విడుదలకు ఐదు రోజుల ముందు మీడియా, కొంతమంది ప్రముఖులకు ప్రత్యేక ప్రదర్శన ఇచ్చారు. అయితే కొందరు సెల్‌ఫోన్‌లో చిత్రీకరించి సోషల్ మీడియాలో షేర్ చేశారు. ఆ వీడియోలో స్పష్టత లేకపోవడంతో ప్రేక్షకుల నుంచి విమర్శలు వచ్చాయి. ట్రైలర్ వాయిదా పడటంతో సినిమా విడుదల తేదీ మారే అవకాశం ఉందన్న అనుమానాలు వ్యక్తమవుతున్నాయి.

గతంలో ఈ చిత్రం నుంచి విడుదల చేసిన మూడు నిమిషాల ఇంట్రడక్షన్ వీడియో, ఫస్ట్‌లుక్ కూడా అంచనాలు అందుకోలేదు. రణ్‌బీర్ కపూర్ ఓ సందర్భంలో "భగవాన్ శ్రీరామ్ ఆశీర్వాదం ఉంది, అందరి ప్రేమకు కృతజ్ఞతలు" అని వ్యాఖ్యానించారు.