ఓటర్ల జాబితా ప్రక్రియ ఈసీ నిబంధన, బీజేపీ చట్టం కాదు: రామచంద్రరావు

తెలంగాణ బీజేపీ అధ్యక్షుడు రామచంద్రరావు ఓటర్ల జాబితా సవరణపై మీడియాతో మాట్లాడారు. ప్రస్తుతం జరుగుతున్న ఇంటింటికీ వెళ్లి ఫారాలు ఇచ్చే ప్రక్రియ ఎన్నికల సంఘం నిబంధన అని చెప్పారు.

బూత్ లెవల్ ఆఫీసర్లు (బీఎల్ఓ) ప్రతి ఇంటికి వెళ్లి ఓటర్లకు ఫారాలు అందజేస్తారని తెలిపారు. ఇందులో ఒక డిక్లరేషన్‌పై సంతకం చేయాలని, తన ఓటు వేరే చోట లేదని ప్రకటించాలని వివరించారు. తప్పుడు డిక్లరేషన్ ఇస్తే రిప్రజెంటేషన్ ఆఫ్ పీపుల్ చట్టం కింద ఏడాది జైలు శిక్ష విధించే అవకాశం ఉందని ఎన్నికల కమిషన్ నిబంధనలున్నాయన్నారు.

ఈ ప్రక్రియలో డూప్లికేట్, దొంగ, ట్రాన్స్ఫర్ ఓట్లను తొలగించడం జరుగుతుందని రామచంద్రరావు చెప్పారు. ఇది కాంగ్రెస్, బీఆర్ఎస్, ఎంఐఎం పార్టీలు కూడా ఉపయోగించుకునే అవకాశం ఉందని, ఎలాంటి పక్షపాతం చూపడం లేదన్నారు.

కాంగ్రెస్ పార్టీ, ముఖ్యమంత్రి రేవంత్ రెడ్డి ఈ విషయంలో అబద్ధాలు ప్రచారం చేస్తున్నారని ఆరోపించారు. తాము చేతకాని విషయంలో బీజేపీపై నిందలు వేయడం సరికాదని విమర్శించారు.