ధురంధర్ 2: 100 రోజులు పూర్తి, వసూళ్లు ₹1900 కోట్లు; రణవీర్ సరికొత్త రికార్డు

రణవీర్ సింగ్, ఆదిత్య ధర్ కాంబినేషన్‌లో వచ్చిన 'ధురంధర్ ది రివెంజ్' సినిమా థియేటర్లలో 100 రోజులు పూర్తి చేసుకుంది. మార్చి 19న విడుదలైన ఈ చిత్రం ప్రస్తుతం జియో హాట్‌స్టార్‌లో స్ట్రీమింగ్ అవుతోంది. ఓటీటీలోకి వచ్చిన తర్వాత కూడా టికెట్ల వసూళ్లు కొనసాగుతున్నాయి.

ట్రేడ్ వర్గాల అంచనాల ప్రకారం.. 'ధురంధర్ ది రివెంజ్' ప్రపంచవ్యాప్తంగా ₹1,900 కోట్లకు పైగా గ్రాస్ వసూళ్లను రాబట్టింది. గత ఏడాది, ఎలాంటి అంచనాలు లేకుండా వచ్చిన మొదటి భాగం 'ధురంధర్' సుమారు ₹1,300 కోట్లు కలెక్ట్ చేసి బ్లాక్‌బస్టర్‌గా నిలిచింది. ఈ రెండు చిత్రాలు కలిపి ₹3,000 కోట్లకు పైగా వసూళ్ల మైలురాయిని అధిగమించాయి.

ఈ విజయంతో రణవీర్ సింగ్.. వరుసగా రెండు సినిమాలతో ₹1,000 కోట్ల క్లబ్‌లో చేరిన తొలి హిందీ హీరోగా రికార్డు సృష్టించారు. 'ధురంధర్ 2'.. ఇప్పటివరకు అత్యధిక వసూళ్లు సాధించిన హిందీ చిత్రంగా నిలిచింది.

ఐపీఎల్ సీజన్‌లో కూడా థియేటర్లలో మంచి ఆక్యుపెన్సీ నమోదు కావడం విశేషం. ప్రస్తుతం డిజిటల్‌లో కూడా ఈ స్పై థ్రిల్లర్‌కు మంచి స్పందన లభిస్తోంది. రానున్న రోజుల్లో ఈ రికార్డును ఏ చిత్రం బద్దలు కొడుతుందో చూడాలి.