రాప్తాడు దాడి కేసు నిందితుడు హేమంత్‌కు కర్నూలులో చికిత్స: పల్మనరీ ఎంబాలిజం నిర్ధారణ

రాప్తాడు పాఠశాల దాడి కేసు నిందితుడు హేమంత్‌కు కర్నూలు ప్రభుత్వ ఆసుపత్రిలో చికిత్స జరుగుతోంది. అతనికి పల్మనరీ ఎంబాలిజం ఉన్నట్టు వైద్య పరీక్షల్లో నిర్ధారణ అయింది. ఊపిరితిత్తులకు రక్తం అందించే రక్తనాళాల్లో రక్తం గడ్డకట్టడాన్ని పల్మనరీ ఎంబాలిజం అంటారు. ప్రస్తుతం ప్రాణాపాయం లేదని వైద్యులు స్పష్టం చేశారు.

గడ్డకట్టిన రక్తాన్ని కరిగించేందుకు అతనికి ప్రత్యేక ఇంజెక్షన్లు ఇస్తున్నారు. అతనికి గుండెకు సంబంధించిన సమస్య కూడా ఉండటంతో కార్డియాక్ ఐసీయూలో చేర్చారు. పల్మనాలజిస్టులు, గుండె నిపుణులు అతని ఆరోగ్యాన్ని పర్యవేక్షిస్తున్నారు.

ఊపిరితిత్తుల CT స్కాన్, 2D ఎకో, ECG, D-dimer పరీక్షలు చేశారు. కుడి కాలుకు రక్తం సరఫరాలో సమస్య ఉన్నట్టు గుర్తించిన వైద్యులు గడ్డకట్టిన రక్తాన్ని తొలగించారు. ఈ నెల 13 రాత్రి తీవ్రమైన ఆయాసంతో అతన్ని ఆసుపత్రికి తీసుకొచ్చినట్టు వైద్యులు తెలిపారు.

ఇంజెక్షన్ల తర్వాత ఆయాసం తగ్గిందని, ఆరోగ్యం మెరుగుపడుతోందని వైద్యులు చెప్తున్నారు. మరో మూడు రోజులు ఐసీయూలోనే పర్యవేక్షణలో ఉంచుతామని తెలిపారు. నిందితుడు జ్యుడీషియల్ కస్టడీలో ఉన్నందున పోలీసులతో పాటు ప్రత్యేక వైద్య బృందం కూడా అతని వద్ద ఉంటోంది.

గత నెల 31న అనంతపురం జిల్లా రాప్తాడు మండల కేంద్రంలోని ప్రభుత్వ హైస్కూల్లో పదో తరగతి చదివే విద్యార్థినిపై హేమంత్ రంపంతో దాడి చేశాడు. ఆ దాడిలో విద్యార్థిని ముఖం, తలపై తీవ్ర గాయాలయ్యాయి. దాడిని ఆపడానికి ప్రయత్నించిన మరో విద్యార్థి కూడా గాయపడ్డాడు.

పారిపోయిన హేమంత్‌ను ఆత్మకూరు అడవుల్లో పోలీసులు గుర్తించారు. కాలుకు కాల్పులు జరిపి అతన్ని అదుపులోకి తీసుకుని ఆసుపత్రిలో చేర్చారు. అనంతరం అతన్ని కర్నూలు ప్రభుత్వ ఆసుపత్రికి తరలించారు. మరో రెండు రోజుల్లో పల్మనరీ ఎంబాలిజం నుంచి పూర్తిగా కోలుకునే అవకాశం ఉందని వైద్యులు చెప్తున్నారు.