AP పట్టణ స్థానిక సంస్థల ఎన్నికలు: నవంబర్ 26న పోలింగ్, 30న ఫలితాలు

ఆంధ్రప్రదేశ్‌లోని 23 పట్టణ స్థానిక సంస్థలకు నవంబర్ 26న పోలింగ్ జరుగుతుంది. ఓట్ల లెక్కింపు నవంబర్ 30న జరిగి అదే రోజు ఫలితాలు ప్రకటిస్తారు.

అభ్యర్థులు ఇప్పుడు నామినేషన్లు దాఖలు చేస్తున్నారు. నామినేషన్ల స్వీకరణకు రేపు చివరి తేదీ. ఎల్లుండి నామినేషన్ల పరిశీలన ఉంటుంది. ఈ నెల 19న ఉపసంహరణకు చివరి తేదీ. అదే రోజు తుది అభ్యర్థుల జాబితా ప్రకటిస్తారు.

అవసరమైన చోట నవంబర్ 27న రీపోలింగ్ నిర్వహిస్తారు. డిసెంబర్ 5 లేదా 6న పరోక్ష ఎన్నికలు జరుగుతాయి.

శ్రీకాకుళం, కాకినాడ, రాజమహేంద్రవరం, మంగళగిరి, తాడేపల్లి మున్సిపల్ కార్పొరేషన్లకు ఎన్నికలు జరుగుతాయి. ఆముదాలవలస, రాజాం, పాలకొల్లు, భీమవరం, గుడివాడ, నరసరావుపేట, బాపట్ల, కందుకూరు, పొదిలి, కావలి, గూడూరు, అల్లూరు, శ్రీకళహస్తి తదితర నగర పంచాయతీలకు ఎన్నికలు జరగనున్నాయి.

మరోవైపు పంచాయతీ ఎన్నికల నామినేషన్ల ప్రక్రియ ప్రారంభమైంది. నామినేషన్ల స్వీకరణకు గడువు విధించారు. ఈ నెల 18న నామినేషన్ల పరిశీలన ఉంటుంది. 19న తిరస్కరించిన నామినేషన్లపై అప్పీల్ చేసుకోవచ్చు. 20న అప్పీళ్లపై పరిష్కారం లభిస్తుంది. 21న మధ్యాహ్నం 3 గంటల వరకు ఉపసంహరణకు గడువు. ఆ తర్వాత తుది అభ్యర్థుల జాబితా ప్రకటిస్తారు.

ఈ నెల 26న ఉదయం 7 నుంచి మధ్యాహ్నం 1 గంట వరకు పంచాయతీ ఎన్నికల పోలింగ్ జరుగుతుంది. మధ్యాహ్నం 2 గంటల నుంచి కౌంటింగ్ ప్రారంభమవుతుంది. అదే రోజు ఫలితాలు ప్రకటిస్తారు. ఫలితాల తర్వాత ఉపసర్పంచ్ ఎన్నిక జరుగుతుంది. అవసరమైన చోట 27న ఉదయం 7 నుంచి మధ్యాహ్నం 1 గంట వరకు రీపోలింగ్ ఉంటుంది. రీపోలింగ్ తర్వాత అదే రోజు లెక్కింపు, ఫలితాలు ప్రకటిస్తారు.