విద్యతో పాటు వివేకం, ఆసక్తి ఉండాలి: ఎంఎల్సీ కోదండరాం

ఎంఎల్సీ ప్రొఫెసర్ కోదండరాం 'షేపింగ్ టుమారో' కార్యక్రమంలో ముఖ్య అతిథిగా పాల్గొన్నారు. ఈ సందర్భంగా కాఫీ టేబుల్ బుక్‌ను ఆవిష్కరించారు. కార్యక్రమం ఏర్పాటు చేసినందుకు, పుస్తకాన్ని తీసుకొచ్చినందుకు ఆయన నిర్వాహకులను అభినందించారు.

ఆలోచనలు, టెక్నాలజీ చాలా వేగంగా మారుతున్నాయని కోదండరాం అన్నారు. విద్య వివేకంతో కూడి ఉండాలన్నారు. వివేకం లేని విద్య ప్రయోజనం చేకూర్చదని ఆయన అభిప్రాయపడ్డారు. ఏఐ వచ్చిన తర్వాత కూడా వివేకాన్ని అందించే బాధ్యత మనుషులపైనే ఉందని చెప్పారు. ఏ దాన్ని ఎలా ఉపయోగించాలో నిర్ణయించాల్సింది మనమేనని అన్నారు.

ప్రభుత్వం విద్యారంగంపై దృష్టి పెడుతోందని ఆయన అన్నారు. ప్రాథమిక, ఉన్నత విద్య రెండింటినీ పెంపొందించాల్సిన అవసరం ఉందని తెలిపారు. పిల్లల ఆసక్తులకు, వారు చదువుతున్న చదువుకు మధ్య వ్యత్యాసం ఉందన్నారు. ఆసక్తి ఉన్న విషయాన్ని నేర్చుకోవడానికి ప్రోత్సహించాలని సూచించారు.

మార్కులపై అధిక దృష్టి పెట్టడం వల్ల చదువుకునే విధానం ప్రభావితమవుతోందని కోదండరాం అన్నారు. జిజ్ఞాస అన్నిటికంటే కీలకమని, అది లేకపోతే చదువు నిరుపయోగంగా మారుతుందని ఆయన చెప్పారు. ఎంచుకున్న సబ్జెక్టులో సాధించే నైపుణ్యమే భవిష్యత్తును నిర్ణయిస్తుందని తెలిపారు.