ఏపీ తీర ప్రాంతంలో భారీ రేర్ ఎర్త్ నిక్షేపాలు: అటామిక్ ఎనర్జీ మాజీ శాస్త్రవేత్త

ఆంధ్రప్రదేశ్ తీరం వెంబడి రేర్ ఎర్త్ ఖనిజాల నిక్షేపాలు గణనీయంగా ఉన్నట్లు అటామిక్ ఎనర్జీ మాజీ శాస్త్రవేత్త ఆచార్య యుగంధర్ రావు తెలిపారు. ఇచ్చాపురం నుంచి నెల్లూరు జిల్లా తడ వరకు సముద్ర తీరంలోని బీచ్ సాన్లో ఈ ఖనిజాలు లభ్యమవుతాయని ఆయన చెప్పారు.

ఈ ఖనిజాల్లో ఇల్మనైట్, రూటైల్, జిర్కాన్, గార్నెట్, సిలిమినైట్, మోనజైట్ వంటివి ఉన్నాయి. ముఖ్యంగా మోనజైట్ నుంచి రేర్ ఎర్త్ ఎలిమెంట్లు (17 మూలకాలు) వెలికితీయవచ్చు. మోనజైట్ రేడియోధార్మిక ఖనిజం కావడంతో దీని అన్వేషణ, లైసెన్సింగ్ అటామిక్ మినరల్స్ డైరెక్టరేట్ (ఏఎండీ) నిర్వహిస్తుంది. గతంలో ప్రైవేట్ రంగానికి అనుమతులిచ్చినా, 2015లో జరిగిన కొన్ని అక్రమాల నేపథ్యంలో ప్రస్తుతం పూర్తిగా ప్రభుత్వ రంగానికే పరిమితం చేశారు.

ఆంధ్రప్రదేశ్‌లో దేశంలోని మొత్తం ఈ ఖనిజ వనరుల్లో 1/3 వంతు ఉన్నట్లు యుగంధర్ రావు అంచనా వేశారు. ముఖ్యంగా ఉత్తరాంధ్ర ప్రాంతం (శ్రీకాకుళం నుంచి విశాఖ జిల్లాల వరకు) ఈ నిక్షేపాలకు ప్రసిద్ధి. భోగాపురం విమానాశ్రయం నిర్మాణ ప్రాంతంలో కూడా ఇటువంటి నిక్షేపాలు ఉన్నాయని ఆయన వివరించారు.

రేర్ ఎర్త్ ఎలిమెంట్లు ఏరోస్పేస్, రక్షణ రంగం, విండ్ ఎనర్జీ, వైద్య పరికరాలు, ఎల్ఈడీ లైట్లు, పర్మనెంట్ మాగ్నెట్ల తయారీలో ఉపయోగపడతాయి. అయితే ఈ ఖనిజాల ప్రాసెసింగ్‌లో చైనా దేశం సాంకేతికంగా ముందంజలో ఉంది. కేంద్రం 24 కీలక ఖనిజాలను నోటిఫై చేయగా, వాటిలో 10% బీచ్ సాండ్‌లో ఉండగా, ఆంధ్రప్రదేశ్‌లో వీటిలో 1/3 ఉన్నట్లు తెలిపారు.

ఈ నేపథ్యంలో ఏపీ ప్రభుత్వం రేర్ ఎర్త్ ఖనిజాల అభివృద్ధికి ముందుకు రావాలని యుగంధర్ రావు సూచించారు. లీజులను ప్రైవేట్ కంపెనీలకు ఇవ్వడం ద్వారా పెట్టుబడులు రావడంతో పాటు స్థానిక ఉపాధి అవకాశాలు పెరుగుతాయన్నారు. అయితే మైనింగ్‌లో 15% ఖనిజాలను మాత్రమే తీసి, మిగతా భాగాన్ని తిరిగి నింపడం, పునరుద్ధరణ చేపట్టడం వంటి పర్యావరణ జాగ్రత్తలు తీసుకోవాలన్నారు. సముద్ర తీర మత్స్యకారుల జీవనోపాధికి ఇబ్బంది కలగకుండా ప్రణాళికలు ఉండాలన్నారు.

ఈ అపార ఖనిజ సంపదను పూర్తిగా ఉపయోగించుకోవడానికి రాష్ట్రంలోని విశ్వవిద్యాలయాల్లో రేర్ ఎర్త్ మినరల్స్‌పై ప్రత్యేక కోర్సులు ప్రవేశపెట్టాలని ఆయన సూచించారు. ప్రస్తుతం ఏపీ ప్రభుత్వానికి సలహాదారుగా ఉన్న యుగంధర్ రావు విశాఖపట్నంలో విలేకరులతో మాట్లాడుతూ ఈ విషయాలు వెల్లడించారు.