రుణాలతో ఇన్సూరెన్స్ తప్పనిసరి వద్దు: బ్యాంకులకు ఆర్బీఐ కఠిన ఆదేశాలు

రుణం తీసుకునే సమయంలో బ్యాంకులు ఇన్సూరెన్స్ బలవంతంగా అమ్మడాన్ని ఆర్బీఐ పూర్తిగా నిషేధించింది. ఆర్థిక ఉత్పత్తుల తప్పుడు అమ్మకాలు (మిస్‌సెల్లింగ్) అడ్డుకునేందుకు ఆర్బీఐ కొత్త నియమాలను జారీ చేసింది. 2027 జనవరి 1 నుంచి ఈ నిబంధనలు అమల్లోకి వస్తాయి.

ఇకపై రుణం ఇచ్చేటప్పుడు ఖాతాదారుడిని నిర్దిష్ట ఇన్సూరెన్స్ సంస్థను ఎంచుకోమని బలవంతం చేయడం కుదరదు. వినియోగదారుడు తనకు నచ్చిన ఇన్సూరర్‌ను స్వేచ్ఛగా ఎంచుకోవచ్చు. మిస్‌సెల్లింగ్ అంటే ఏమిటో ఆర్బీఐ స్పష్టంగా నిర్వచించింది – వినియోగదారుడికి సరిపడని ఉత్పత్తిని అమ్మడం, రిస్కులు, చార్జీలు లేదా ముఖ్యమైన నిబంధనలను దాచడం, తప్పుదోవ పట్టించే సమాచారం ఇవ్వడం, బండిల్డ్ ఉత్పత్తిని తప్పనిసరి చేయడం వంటివి ఇందులో ఉంటాయి.

కొత్త నిబంధనల్లో వినియోగదారుడి ప్రాధాన్యతకే పెద్దపీట వేశారు. ఏదైనా ఆర్థిక ఉత్పత్తిని విక్రయించే ముందు బ్యాంకు వినియోగదారుడి వయసు, ఆదాయం, రిస్క్ ప్రొఫైల్, ఆర్థిక అవగాహనను పరిశీలించాలి. రిస్కులు, చార్జీలు, లాకిన్ పీరియడ్, నిబంధనలు పారదర్శకంగా తెలియజేయాలి. డిజిటల్ వేదికలపై మోసపూరిత డార్క్ ప్యాటర్న్స్ – నకిలీ అత్యవసరం, తప్పుదోవ పట్టించే ఆఫర్లు, దాచిన చార్జీలు, ముందే టిక్ చేసిన కంట్రోల్ బాక్సులను కూడా కఠినంగా నిరోధిస్తారు.

తప్పుడు అమ్మకం రుజువైతే వినియోగదారుడికి పూర్తి రీఫండ్ లభించడంతోపాటు, బ్యాంకు నష్టపరిహారం కూడా చెల్లించాల్సి ఉంటుందని ఆర్బీఐ హెచ్చరించింది. బాధ్యతాయుతంగా, పారదర్శకంగా, వినియోగదారుడి ప్రయోజనాలకు ముందుంచి ఆర్థిక ఉత్పత్తులు విక్రయించాలన్న స్పష్టమైన సందేశమే ఈ నిబంధనల సారాంశం.