ఆర్బీఐ బంగారం విక్రయించినట్లు వచ్చిన Bloomberg నివేదికలను RBI, కేంద్రం ఖండించాయి

ఆర్బీఐ భారీగా బంగారం విక్రయించినట్లు అంతర్జాతీయ మీడియా సంస్థ Bloomberg ప్రచురించిన కథనాలు నిరాధారమని భారతీయ రిజర్వ్ బ్యాంక్ (ఆర్బీఐ), కేంద్ర ప్రభుత్వం ఖండించాయి. పశ్చిమాసియా సంక్షోభం నేపథ్యంలో రూపాయి విలువను కాపాడేందుకు విదేశీ మారక నిల్వలు పెంచుకోవడానికి ఆర్బీఐ 12 బిలియన్ డాలర్ల విలువైన బంగారాన్ని విక్రయించిందని Bloomberg కథనం రాసింది.

ఈ కథనంలో ఎలాంటి నిజం లేదని ఆర్బీఐ స్పష్టం చేసింది. తమ వద్ద ఉన్న భౌతిక బంగారం నిల్వల్లో మార్పు లేదని, ప్రస్తుతం దేశంలో 880.52 టన్నుల బంగారం సురక్షితంగా ఉందని ఆర్బీఐ పేర్కొంది. ఇలాంటి విషయాల్లో కేవలం అధికారిక సమాచారాన్ని మాత్రమే నమ్మాలని ప్రజలకు సూచించింది.

కేంద్ర ప్రభుత్వ అధికారిక వాస్తవ పరిశీలన విభాగం (పిఐబి ఫాక్ట్ చెక్) కూడా Bloomberg కథనాన్ని తోసిపుచ్చింది. విదేశీ మారక నిల్వల్లో బంగారం వాటా తగ్గలేదని, పెరిగిందని గణాంకాలతో సహా వివరించింది. 2025 సెప్టెంబర్ చివరి నాటికి ఈ వాటా 13.92 శాతంగా ఉండగా, 2026 మార్చి 31 నాటికి అది 16.70 శాతానికి పెరిగింది.