భారీ బంగారం అమ్మకాల వార్తలు అవాస్తవం: 880.52 టన్నుల నిల్వలు స్థిరంగా ఉన్నాయని RBI స్పష్టీకరణ

భారతీయ రిజర్వ్ బ్యాంక్ (RBI) విదేశీ మారక నిల్వలను కాపాడుకునేందుకు పెద్ద ఎత్తున బంగారాన్ని విక్రయించినట్లు వచ్చిన వార్తలను ఖండించింది. ఈ విషయంపై బ్లూమ్‌బర్గ్ ప్రచురించిన కథనం పూర్తిగా అవాస్తవమని, భౌతిక బంగారం నిల్వలు ఇంకా 880.52 టన్నుల వద్దే స్థిరంగా ఉన్నాయని కేంద్ర బ్యాంకు స్పష్టం చేసింది.

ఇలాంటి సున్నితమైన విషయాలలో ప్రజలు తాము అధికారికంగా విడుదల చేసే సమాచారాన్ని మాత్రమే నమ్మాలని ఆర్‌బీఐ సూచించింది. ఈ బంగారం విక్రయ వార్తల్లో ఎలాంటి వాస్తవాలు లేవని ఆర్‌బీఐ ఫ్యాక్ట్ చెక్ విభాగం ఎక్స్ వేదికగా ఒక పోస్ట్‌లో పేర్కొంది.

అటు ఆర్‌బీఐ వద్ద ఉన్న ఫారెక్స్ నిల్వల్లో బంగారం వాటా 2025లో 13.92 శాతం ఉండగా, 2026 మార్చి 31 నాటికి 16.7 శాతానికి పెరిగినట్లు కేంద్ర ప్రభుత్వం వెల్లడించింది. బంగారం నిల్వల మొత్తం పరిమాణంలో మాత్రం ఎలాంటి మార్పు జరగలేదని, ఆర్‌బీఐ ఈ సంఖ్యను స్థిరంగా కొనసాగిస్తోందని అధికారిక ప్రకటనలో తెలిపింది.