కేంద్రానికి RBI నుంచి రికార్డు స్థాయిలో ₹2.87 లక్షల కోట్ల డివిడెండ్

రిజర్వ్ బ్యాంక్ ఆఫ్ ఇండియా (RBI) కేంద్ర ప్రభుత్వానికి ₹2,87,000 కోట్ల డివిడెండ్ బదిలీ చేయనున్నట్లు ప్రకటించింది. ఇది ఇప్పటివరకు RBI ప్రకటించిన అత్యధిక డివిడెండ్ మొత్తం.

2025-26 ఆర్థిక సంవత్సరంలో RBI ఆదాయం ₹3,95,972 కోట్లకు పైగా చేరింది. అవసరాల కోసం 5.5% నుంచి 7.5% వరకు నిల్వగా ఉంచుకొని, మిగిలిన మొత్తాన్ని కేంద్రానికి బదిలీ చేయడం RBI విధానం.

RBI కి ఆదాయం ఎలా వస్తుందంటే — $600 బిలియన్లకు పైగా ఉన్న విదేశీ మారక నిల్వలను అమెరికా, యూరప్ ప్రభుత్వ బాండ్లలో పెట్టుబడి పెడతారు. ప్రపంచవ్యాప్తంగా వడ్డీ రేట్లు పెరగడంతో ఆ పెట్టుబడులపై వడ్డీ ఆదాయం అధికంగా వచ్చింది. భారత ప్రభుత్వ బాండ్లపై వడ్డీ, డాలర్ కొనుగోలు-అమ్మకాల ద్వారా వచ్చే లాభాలు, బ్యాంకులకు రెపో రేటుపై ఇచ్చే రుణాలపై వడ్డీ కూడా RBI ఆదాయ వనరులే.

గత కొన్నేళ్ల RBI డివిడెండ్ వివరాలు చూస్తే — 2020లో ₹57,100 కోట్లు, 2021లో ₹99,100 కోట్లు, 2022లో ₹30,300 కోట్లు, 2023లో ₹87,000 కోట్లకు పైగా, 2024లో ₹2,10,000 కోట్లు, 2025లో ₹2,70,000 కోట్లు బదిలీ చేసింది. ప్రస్తుత 2026 ఏడాదిలో ₹2,87,000 కోట్లతో కొత్త రికార్డు నమోదైంది.

మధ్యప్రాచ్యంలో నడుస్తున్న యుద్ధ పరిస్థితుల వల్ల పెట్రోల్, డీజిల్ ధరల ఒత్తిడి కారణంగా కేంద్రంపై దాదాపు ₹1,50,000 కోట్ల అదనపు భారం పడిందని అంచనాలు ఉన్నాయి. Bank of Baroda ఈ భారం ₹1 లక్ష కోట్లకు పైగా ఉంటుందని ఒక రిపోర్టులో పేర్కొంది. RBI డివిడెండ్ ఆ నష్టాన్ని భర్తీ చేయడంలో తోడ్పడనుంది.