RBI బంగారం విక్రయించినట్లు బ్లూమ్బర్గ్ కథనం; ప్రభుత్వం ఖండించింది

రిజర్వ్ బ్యాంక్ ఆఫ్ ఇండియా (ఆర్బిఐ) గత నెలలో దాదాపు 57,000 కోట్ల రూపాయల ($6 బిలియన్) విలువైన బంగారం విక్రయించినట్లు బ్లూమ్బర్గ్ సంస్థ ఒక కథనంలో నివేదించింది. పశ్చిమాసియా యుద్ధం, రూపాయి విలువ తగ్గుదల, విదేశీ ఇన్వెస్టర్ల ఔట్‌ఫ్లోల మధ్య ఫారెక్స్ నిల్వలకు మద్దతు ఇవ్వడానికే ఈ విక్రయం చేపట్టినట్లు ఆ కథనం పేర్కొంది.

భారత విదేశీ మారకద్రవ్య నిల్వలు గత నాలుగు నెలల్లో 47 బిలియన్ డాలర్లకుపైగా తగ్గాయి. ఫిబ్రవరిలో 728.49 బిలియన్ డాలర్లుగా ఉన్న నిల్వలు ఇప్పుడు 684 బిలియన్ డాలర్లకు పడిపోయాయి. జనవరి నుంచి విదేశీ పోర్ట్‌ఫోలియో ఇన్వెస్టర్లు స్టాక్ మార్కెట్‌ల నుంచి 2.25 లక్షల కోట్ల రూపాయలకుపైగా ఉపసంహరించుకున్నారు. చమురు దిగుమతుల బిల్లు భారీగా పెరగడంతో కరెంట్ ఖాతా లోటు విస్తరిస్తోంది.

ఆర్బిఐ వద్ద మార్చి నాటికి 880 టన్నుల బంగారం నిల్వలు ఉన్నాయి. వాటిలో 77 శాతం భారత్‌లోనే నిల్వ చేయబడ్డాయి. విదేశీ మారకద్రవ్య నిల్వల్లో బంగారం వాటా 13.92 శాతం నుంచి మే 22 నాటికి 16.85 శాతానికి పెరిగింది.

అయితే, బ్లూమ్బర్గ్ కథనంలోని వాదనలను కేంద్ర ప్రభుత్వం ఖండించింది. పీఐబీ ఫ్యాక్ట్ చెక్ ట్విట్టర్ (ఎక్స్)లో ఈ వార్త అవాస్తవమని స్పష్టం చేసింది. ఆర్బిఐ తన వద్ద ఉన్న ఫిజికల్ గోల్డ్ వివరాలను ప్రతి నెలా బులెటిన్‌లో ప్రచురిస్తున్నందున, బంగారం విక్రయం జరిగినట్లు ఎటువంటి సమాచారం లేదని తెలిపింది. పౌరులు తప్పుడు నివేదికలను నమ్మొద్దని సూచించింది.