ఆర్‌బీఐ ద్రవ్య విధాన కమిటీ భేటీ: ద్రవ్యోల్బణం, రూపాయి పతనంపై కీలక నిర్ణయం శుక్రవారం

రిజర్వ్ బ్యాంక్ ఆఫ్ ఇండియా (ఆర్‌బీఐ) ద్రవ్య విధాన కమిటీ (ఎంపీసీ) మూడు రోజుల సమావేశం ముంబైలో ప్రారంభమైంది. శుక్రవారం నాడు గవర్నర్ సంజయ్ మల్హోత్రా విధాన ప్రకటన విడుదల చేయనున్నారు. ప్రస్తుతం ఉన్న వడ్డీ రేటును యథాతథంగా కొనసాగించే అవకాశం ఎక్కువగా ఉన్నట్లు విశ్లేషకులు భావిస్తున్నారు. ద్రవ్యోల్బణం, రూపాయి విలువ పతనం కలిసి ఆర్‌బీఐకి పెద్ద సవాల్‌గా మారాయి. వినియోగదారుల ధరల సూచీ (సీపీఐ) ద్రవ్యోల్బణం 3.48%కి చేరుకుని 13 నెలల గరిష్ట స్థాయిలో ఉంది. గ్రామీణ ప్రాంతాల్లో ఇది 3.6%గా, ఆహార ద్రవ్యోల్బణం 4.2%గా నమోదైంది. ఇది ఆర్‌బీఐ నిర్దేశించిన 2–6% పరిధిలో ఉన్నప్పటికీ, ఆహార ధరల ఒత్తిడి రేటు పెంపునకు దారితీయవచ్చని నిపుణులు హెచ్చరిస్తున్నారు. మరోవైపు విదేశీ సంస్థాగత పెట్టుబడిదారులు (ఎఫ్ఐఐలు) నిధులు వెనక్కి తీసుకోవడంతో రూపాయి విలువ 90 దాటి 100 మార్కు వైపు దూసుకెళ్తోంది. ఈ నేపథ్యంలో రూపాయి పతనాన్ని నియంత్రించడానికి ఆర్‌బీఐ సుమారు 12 బిలియన్ డాలర్ల విలువైన బంగారాన్ని విక్రయించినట్లు బ్లూమ్‌బెర్గ్ నివేదిక పేర్కొనగా, ప్రభుత్వం, ఆర్‌బీఐ ఈ వాదనను ఖండించాయి. ద్రవ్యోల్బణం ఖర్చు తోపుడు (కాస్ట్‌-పుష్) రూపంలో ఉండటంతో అన్ని రంగాలపై ప్రతికూల ప్రభావం పడే ప్రమాదం ఉంది. విదేశీ మారక సంక్షోభం నుంచి బయటపడేందుకు కేంద్రం మొత్తం ప్రభుత్వ విధానం (హోల్ ఆఫ్ గవర్నమెంట్) అమలు చేసే అవకాశం ఉందని, ఆర్థిక మంత్రిత్వ శాఖ కూడా విదేశీ పెట్టుబడులను తిరిగి రప్పించే చర్యలు ప్రకటించవచ్చని విశ్లేషకులు భావిస్తున్నారు. ప్రధాని నరేంద్ర మోదీ ఇప్పటికే ‘సంపూర్ణ దేశ విధానం’ ద్వారా పొదుపు చర్యలు చేపట్టాలని సూచించారు. శుక్రవారం వెలువడే ఆర్‌బీఐ ప్రకటనపై అందరి దృష్టీ నెలకొంది.