కేంద్రానికి ₹2.87 లక్షల కోట్ల డివిడెండ్ — RBI నిర్ణయం

2025-26 ఆర్థిక సంవత్సరానికి కేంద్ర ప్రభుత్వానికి ₹2.87 లక్షల కోట్లు డివిడెండ్ రూపంలో అందించనున్నట్లు Reserve Bank of India (RBI) ప్రకటించింది.

RBI గవర్నర్ సంజయ్ మల్హోత్రా అధ్యక్షతన సెంట్రల్ బోర్డు డైరెక్టర్ల సమావేశం జరిగింది. ఈ సమావేశంలో డైరెక్టర్లు డివిడెండ్ ప్రతిపాదనను ఆమోదించారు.

2025-26లో RBI నికర ఆదాయం ₹3.96 లక్షల కోట్లుగా నమోదైంది. దేశీయ, అంతర్జాతీయ ఆర్థిక పరిస్థితులు సమీక్షించిన తర్వాత ఈ నిర్ణయం తీసుకున్నట్లు RBI వెల్లడించింది.

గత సంవత్సరం అంటే 2024-25లో RBI కేంద్రానికి ₹2.69 లక్షల కోట్లు డివిడెండ్ గా అందించింది. ఈ సారి అది ₹2.87 లక్షల కోట్లకు పెరిగింది.

పశ్చిమాసియా సంక్షోభం వల్ల ఇంధన దిగుమతుల వ్యయం పెరిగింది. దీంతో ప్రభుత్వ ఆదాయంపై ఒత్తిడి ఉంది. ఈ నేపథ్యంలో RBI అందిస్తున్న రికార్డు డివిడెండ్ కేంద్ర ఖజానాకు ఊరటగా మారనుంది.

ప్రభుత్వరంగ బ్యాంకుల డివిడెండ్లు కలిపి మొత్తం ₹3.16 లక్షల కోట్లు సమకూరుతాయని కేంద్రం బడ్జెట్‌లో అంచనా వేసింది.