ఇంట్లో ఆవకాయ పెట్టే కుటుంబాలు తగ్గిపోతున్నాయి — కారణాలు ఏమిటి?

తెలుగు కుటుంబాల్లో ఒకప్పుడు వేసవిలో ఆవకాయ పచ్చడి తయారీ పెద్ద సంప్రదాయంగా ఉండేది. ఒక్కో కుటుంబం 100-200 మామిడికాయలతో సంవత్సరానికి సరిపడా పచ్చడి పెట్టేది. ఇప్పుడు ఆ సంఖ్య కేవలం 5-10 కాయలకు పడిపోయిందని వ్యాపారులు చెప్తున్నారు.

ధరలు పెరగడం ఒక ప్రధాన కారణం. ఒక్క మామిడికాయ ధర గతంలో ₹5-10 ఉండగా ఇప్పుడు ₹50 దాటింది. ఎండుమిర్చి కిలో ₹250 వరకు ఉంది. గతేడాది ₹120-140 ఉన్న వెల్లుల్లి ఈ ఏడాది ₹200కి చేరింది. అల్లం ₹140-150 అయింది. రష్యా-ఉక్రెయిన్ యుద్ధ ప్రభావంతో నూనె ధరలు, రవాణా ఖర్చులు పెరిగాయని వ్యాపారులు తెలిపారు.

ఈ ఏడాది అకాల వర్షాలు, వాతావరణ మార్పుల వల్ల మామిడికాయల దిగుబడి తక్కువగా ఉంది. ఎండుమిర్చి పంట కూడా తక్కువగా వచ్చింది. దీంతో నాణ్యమైన కాయలు మరియు మిర్చి కొరత ఏర్పడిందని వ్యాపారులు చెప్తున్నారు. రైతులకు కూడా ప్రస్తుత ధరలలో గిట్టుబాటు కావడం లేదని వారు తెలిపారు.

ఆరోగ్య కారణాల వల్ల కూడా చాలా మంది పచ్చడికి దూరమవుతున్నారు. BP, షుగర్, థైరాయిడ్ వంటి సమస్యలు ఉన్న వారికి ఉప్పు, కారం ఎక్కువగా ఉండే పచ్చళ్లను తక్కువగా తినమని డాక్టర్లు సూచిస్తున్నారు.

నగరాల్లో రెడీమేడ్ పచ్చళ్లు కొనుక్కోవడం పెరిగింది. online మార్కెట్ వృద్ధి వల్ల retail మార్కెట్‌కు వ్యాపారం తగ్గిందని స్థానిక వ్యాపారులు చెప్తున్నారు. ఒక కుటుంబానికి సంవత్సరానికి సరిపడా ఆవకాయ పెట్టాలంటే వేల రూపాయలు ఖర్చవుతుందని, దీంతో మధ్య తరగతి కుటుంబాలు వెనకడుగు వేస్తున్నాయని వారు అన్నారు.