రేపు ఆసిఫాబాద్‌లో సీఎం రేవంత్ – రెండో విడత ఇందిరమ్మ ఇండ్ల పథకం ప్రారంభం

తెలంగాణ సీఎం రేవంత్ రెడ్డి రేపు ఆసిఫాబాద్ జిల్లా పర్యటనలో రెండో విడత ఇందిరమ్మ ఇండ్ల పథకాన్ని ప్రారంభించనున్నారు. ఈ పర్యటనలో భాగంగా ఆదివాసీ గూడాలకు చెందిన లబ్ధిదారులతో కలిసి గృహ ప్రవేశ కార్యక్రమాల్లోనూ పాల్గొంటారు.

కొమరంభీం జిల్లా కెరవబేరి మండలం కొరాటి గ్రామంలోని కొత్తగూడ కాలనీలో 25 కుటుంబాల ఇందిరమ్మ ఇండ్ల గృహ ప్రవేశానికి సీఎం హాజరవుతారు. అనంతరం కాగజ్ నగర్ క్రాస్ రోడ్డు వద్ద ఏర్పాటు చేసిన బహిరంగ సభలో ప్రసంగిస్తారు. ఈ సభలో రాష్ట్రవ్యాప్తంగా 4 లక్షల ఇండ్ల నిర్మాణంతో రెండో విడతను ప్రారంభిస్తారు.

మంత్రులు జూపల్లి కృష్ణారావు, పొంగులేటి శ్రీనివాస్ రెడ్డి ఇప్పటికే పర్యటన ఏర్పాట్లను పరిశీలించారు. పోలీసులు మూడు అంచెల భద్రతా ఏర్పాట్లు చేశారు; వెయ్యి మంది సిబ్బందిని మోహరించారు.

ఈ ప్రాంతంలో సీఎం చివరిసారి 45 రోజుల క్రితం పర్యటించారు. తుమ్మిడిహట్టి వద్ద ప్రాణహిత బ్యారేజీ నిర్మాణం కోసం సర్వే పనులు కొనసాగుతున్నాయని, దీనిపై కూడా ముఖ్యమంత్రి ప్రకటన చేసే అవకాశం ఉందని అధికారులు తెలిపారు.

వెనుకబడిన గిరిజన ప్రాంతంలో పర్యటిస్తున్న నేపథ్యంలో రవాణా, విద్య, ఇతర అభివృద్ధి ప్రాజెక్టులకు నిధులు ప్రకటించాలని ఇక్కడి ప్రజలు ఎదురు చూస్తున్నారు.