ZPTC నుంచి CM వరకు: రేవంత్ రెడ్డి 20 ఏళ్ల రాజకీయ ప్రయాణం

తెలంగాణ ముఖ్యమంత్రి రేవంత్ రెడ్డి ప్రజా ప్రతినిధిగా 20 ఏళ్లు పూర్తి చేసుకున్నారు. ఈ సందర్భంగా ఆయన తన రాజకీయ జీవితానికి పునాది వేసిన మహబూబ్‌నగర్ జిల్లా మిడ్జిల్ మండలాన్ని సీఎం హోదాలో సందర్శించారు. 2006లో జెడ్పీటీసీ సభ్యుడిగా గెలిచినప్పటి నుంచి ఇప్పటివరకు ఆయన ప్రయాణాన్ని గుర్తు చేసుకున్నారు.

రేవంత్ రెడ్డి 2006 జూలై 4న మిడ్జిల్ నుంచి స్వతంత్ర అభ్యర్థిగా జెడ్పీటీసీ ఎన్నికల్లో పోటీ చేశారు. ఆ ఎన్నికల్లో కప్పు-శాసర్ గుర్తుపై గెలుపొందారు. తనకు తొలి విజయాన్ని అందించిన మిడ్జిల్ ప్రజలకు సీఎం కృతజ్ఞతలు తెలిపారు. "ఈ గెలుపు నాది కాదు, మిడ్జిల్ ప్రజలది" అని అన్నారు.

ఈ కార్యక్రమంలో ఉప ముఖ్యమంత్రి భట్టి విక్రమార్క మాట్లాడుతూ, రేవంత్ రెడ్డి పేదల కష్టాలు అర్థం చేసుకున్న నాయకుడని, ప్రజల అభివృద్ధే లక్ష్యంగా పనిచేస్తున్నారని అన్నారు. మంత్రి జూపల్లి కృష్ణారావు, రేవంత్ రెడ్డి ఎన్నో అడ్డంకులు దాటి ఈ స్థాయికి చేరిన తీరు యువతకు ఆదర్శమని పేర్కొన్నారు.

కాగా, ప్రజా ప్రతినిధిగా 20 ఏళ్లు పూర్తి చేసుకున్న రేవంత్ రెడ్డిని కలవడానికి ఎమ్మెల్యేలకు ప్రత్యేక సమయం కేటాయించారు. ఈ సమావేశంలో పలువురు కాంగ్రెస్ ఎమ్మెల్యేలు పాల్గొని ఆయనకు శుభాకాంక్షలు తెలియజేశారు.