సీఎం రేవంత్ రెడ్డి: ఉద్యోగుల జీతాలు నెల మొదటి తారీకే, ఆరోగ్య భద్రత కమిటీ ఏర్పాటు

తెలంగాణ ముఖ్యమంత్రి రేవంత్ రెడ్డి ప్రభుత్వ ఉద్యోగులతో మాట్లాడారు. తన ప్రభుత్వం అధికారంలోకి వచ్చిన తర్వాత ప్రతి నెలా మొదటి తారీకున జీతాలు ఇస్తున్నామని చెప్పారు. 2023 డిసెంబర్ 7న బాధ్యతలు చేపట్టిన సమయంలో డిసెంబర్ నెల జీతాలు ఇవ్వలేదని, ఆ బాకీ మాజీ సీఎం కేసీఆర్ ప్రభుత్వానిదేనని స్పష్టం చేశారు.

జనవరి 2024 నుంచి తాము నెల మొదటి తారీకున జీతాలు చెల్లిస్తున్నామని, ఆర్థిక ఎగుడుదిగుడులు ఎదురైనా ఈ విధానం కొనసాగిస్తున్నామని రేవంత్ రెడ్డి పేర్కొన్నారు. రిటైర్మెంట్ బెనిఫిట్ల భారం నెలకు వెయ్యి కోట్ల రూపాయలు అవుతుండగా, ప్రస్తుతం నెలవారీగా రూ. 500-750 కోట్ల వరకు చెల్లిస్తున్నామని వివరించారు. గతంలో ఈ మొత్తం రూ. 200-300 కోట్లకే పరిమితమైందని తెలిపారు.

ఉద్యోగుల ఆరోగ్య భద్రతపై ఒక కమిటీ ఏర్పాటు చేస్తున్నామని, ఈ నెల 27న తొలి సమావేశం జరగనుందని సీఎం ప్రకటించారు. అమలులో ఎదురయ్యే సమస్యలను చర్చించి పరిష్కరిస్తామని, ఉద్యోగులు తమ సూచనలు ఇవ్వాలని కోరారు. ప్రమాదవశాత్తు ఏదైనా సంభవిస్తే ప్రభుత్వమే కుటుంబపెద్దగా నిలుస్తుందని భరోసా ఇచ్చారు.

గత బీఆర్ఎస్ ప్రభుత్వం రాష్ట్రంపై భారీ అప్పు మోపిందని, దీంతో ఉద్యోగులకు జీతాలు కూడా వాయిదాల్లో చెల్లించాల్సి వచ్చిందని రేవంత్ రెడ్డి ఆరోపించారు. ఈ విషయంపై బీఆర్ఎస్ స్పందన తెలియాల్సి ఉంది.