సిఎం రేవంత్ రెడ్డి : ఉద్యోగ నియామకాల్లో పారదర్శకత తీసుకొచ్చాం, 67 వేల పోస్టులు భర్తీ

ముఖ్యమంత్రి రేవంత్ రెడ్డి మాట్లాడుతూ, రాష్ట్రంలో ఉద్యోగ నియామకాల్లో పారదర్శకత తీసుకువచ్చామని చెప్పారు. న్యాయపరమైన ఇబ్బందులు లేకుండా చేపట్టిన నియామక ప్రక్రియలో 67,763 పోస్టులు భర్తీ చేసినట్టు వివరించారు.

గ్రూప్-1, గ్రూప్-2, గ్రూప్-3, గ్రూప్-4 పోస్టులతో పాటు మెగా డీఎస్సీ, వైద్య ఆరోగ్య శాఖలో కూడా నియామకాలు జరిగాయని ఆయన తెలిపారు. టీఎస్పీఎస్సీ సహా ఇతర నియామక బోర్డులను సంస్కరించామని, నియామకాల్లో పారదర్శకత పునరుద్ధరించామని చెప్పారు. ఈ నేపథ్యంలో 562 గ్రూప్-1 అధికారులకు ఫౌండేషన్ కోర్సు శిక్షణ ఇచ్చామన్నారు.

ఈ నెలలోనే ఇంజనీరింగ్, పొల్యూషన్ కంట్రోల్ బోర్డ్, అటవీశాఖ, టౌన్ అండ్ కంట్రీ ప్లానింగ్, విద్యాశాఖల్లో ఉద్యోగ నోటిఫికేషన్లు వస్తాయని రేవంత్ రెడ్డి ప్రకటించారు.

విద్య రంగంలోనూ సంస్కరణలు తీసుకువచ్చామని, సీఎంగా విద్యాశాఖ తన వద్దే ఉంచుకున్నానన్నారు. పబ్లిక్ స్కూళ్లు, యంగ్ ఇండియా ఇంటిగ్రేటెడ్ రెసిడెన్షియల్ స్కూళ్లు ఏర్పాటు చేశామన్నారు. యంగ్ ఇండియా స్కిల్ యూనివర్సిటీలో ఇప్పటివరకు 1,190 మంది విద్యార్థులు కోర్సులు పూర్తి చేయగా, 838 మందికి మైక్రోసాఫ్ట్, ఫ్లిప్కార్ట్, టెక్ మహీంద్రా, డాక్టర్ రెడ్డీస్ వంటి ప్రముఖ సంస్థల్లో ఉద్యోగాలు వచ్చాయని రేవంత్ రెడ్డి తెలిపారు. కేంద్ర ప్రభుత్వం విడుదల చేసిన పీజీఐ సూచీలో తెలంగాణకు మెరుగైన స్థానం లభించిందని ఆయన పేర్కొన్నారు.