మహిళా సంఘాలకు లక్ష కోట్ల రుణ లక్ష్యం : సీఎం రేవంత్ రెడ్డి

CM రేవంత్ రెడ్డి మాట్లాడుతూ, ఒక కోటి మంది మహిళలను కోటీశ్వరులను చేయాలన్న లక్ష్యంతో ప్రభుత్వం కొత్త కార్యక్రమాలు ప్రారంభించిందని తెలిపారు. మహిళా సంఘాలకు బ్యాంకు లింకేజీ, స్త్రీ నిధి ద్వారా లక్ష కోట్ల రూపాయల రుణాలు ఇవ్వాలని లక్ష్యంగా నిర్ణయించామని చెప్పారు.

ఇప్పటికే 60 వేల కోట్ల రూపాయల సున్నా వడ్డీ రుణాలు పంపిణీ చేసినట్లు తెలిపారు. రుణ పరిమితిని 5 లక్షల నుంచి 10 లక్షలకు పెంచినట్లు వివరించారు.

మహిళలను ఇందిరమ్మ క్యాంటీన్లు, సౌర విద్యుత్ యూనిట్లు, పెట్రోల్ బంకుల యజమానులుగా చేశామని, వెయ్యి బస్సులకు మహిళలను యజమానులుగా నియమించేలా అవకాశం కల్పించామని చెప్పారు. ఇందిరా మహిళా శక్తి సూపర్ బజార్లు, లాజిస్టిక్ హబ్బులు, గోదాములు, రైస్ మిల్లుల ఏర్పాటుకు కూడా సిద్ధంగా ఉన్నట్లు తెలిపారు.

రాష్ట్రవ్యాప్తంగా ఒక్క రోజే 8 వేల స్త్రీ శక్తి భవనాల నిర్మాణానికి శంకుస్థాపన చేసినట్లు వివరించారు. అమ్మ ఆదర్శ పాఠశాల కమిటీల ద్వారా పాఠశాలల మౌలిక సదుపాయాలు, యూనిఫాం కుట్టు పనులను మహిళా సంఘాలకు అప్పగించామన్నారు. శిల్పారామంలో మహిళా సంఘాల ఉత్పత్తుల విక్రయానికి స్టాల్ ఏర్పాటు చేసినట్లు తెలిపారు.

"తెలంగాణ మహిళ దేశ పారిశ్రామిక రంగంలో తన స్థానాన్ని సుస్థిరం చేసుకోవడానికి ఎంతో దూరం లేదు" అని సీఎం పేర్కొన్నారు.