సోషల్ మీడియా బలహీనతపై అసంతృప్తి; మంత్రులు, ఎమ్మెల్యేలకు సీఎం రేవంత్ రెడ్డి దిశానిర్దేశం

సోషల్ మీడియాలో కాంగ్రెస్ పార్టీ బలహీనతపై ముఖ్యమంత్రి రేవంత్ రెడ్డి తీవ్ర అసంతృప్తి వ్యక్తం చేశారు. ఇటీవల జరిగిన పార్టీ PAC సమావేశంలో మంత్రులు, ఎమ్మెల్యేలకు ఆయన ఈ విషయంలో క్లాస్ తీసుకున్నారు.

ప్రభుత్వ కార్యక్రమాలను ప్రజల్లోకి తీసుకెళ్లడంలో, విపక్షాల ట్రోలింగ్ను తిప్పికొట్టడంలో నేతలు సోషల్ మీడియాను సమర్థంగా వినియోగించుకోవడం లేదని సీఎం అభిప్రాయపడ్డారు. ప్రతి మంత్రి, ఎమ్మెల్యే సోషల్ మీడియాపై ప్రత్యేక దృష్టి పెట్టాలని, మెయిన్‌స్ట్రీమ్ మీడియాపై మాత్రమే ఆధారపడటం సరికాదని సూచించారు.

విపక్ష పార్టీలు BRS, BJP సోషల్ మీడియా వేదికగా ప్రభుత్వ వ్యతిరేక ప్రచారాన్ని తీవ్రం చేస్తున్నాయి. మీమ్స్, షార్ట్ వీడియోలు, ఏఐ టూల్స్ ఉపయోగించి ప్రభుత్వ విమర్శలను బలంగా ప్రచారం చేస్తున్నారు. దీనిని ఎదుర్కోవడానికి కాంగ్రెస్ కూడా డిజిటల్‌గా బలంగా మారాలని రేవంత్ రెడ్డి స్పష్టం చేశారు.

సీఎం ఆదేశాల నేపథ్యంలో కాంగ్రెస్ శ్రేణులు కదిలాయి. ప్రతి నియోజకవర్గంలో సోషల్ మీడియా ఇంచార్జీలను నియమించాలని, ప్రత్యేక డిజిటల్ టీమ్‌లను ఏర్పాటు చేయాలని నిర్ణయించారు. విపక్షాల విమర్శలకు సమర్థవంతమైన కౌంటర్ ఇవ్వడంపై దృష్టి పెట్టాలని దిశానిర్దేశం చేసింది పార్టీ.

పాలన ఎంత ముఖ్యమో, దాన్ని డిజిటల్ రూపంలో ప్రజల ముందుకు తీసుకెళ్లడం కూడా అంతే ముఖ్యమని పార్టీ సీనియర్లు విశ్లేషిస్తున్నారు. సోషల్ మీడియాను నిర్లక్ష్యం చేస్తే రాజకీయంగా నష్టపోతామని సీఎం హెచ్చరించినట్లు తెలిసింది.