మేడ్చల్‌లో బాలామృతం ప్లాంట్ ప్రారంభించిన సీఎం రేవంత్ రెడ్డి; 2034 నాటికి కోటి మంది మహిళలను కోటీశ్వరులను చేస్తామని ప్రకటన

మేడ్చల్ జిల్లా నాచారంలో శుక్రవారం సీఎం రేవంత్ రెడ్డి, మంత్రి సీతక్కతో కలిసి బాలామృతం ప్లాంట్‌ను ప్రారంభించారు. ఈ సందర్భంగా సీఎం మాట్లాడుతూ మహిళల ఆరోగ్యమే సమాజ ఆరోగ్యానికి మూలమని, మహిళా సాధికారత కోసం ప్రభుత్వం కృషి చేస్తోందని తెలిపారు.

గర్భిణుల నుంచి ఆరేళ్ల వయసు పిల్లల వరకు పౌష్టికాహారాన్ని అందించడం ఈ ప్లాంట్ ప్రధాన లక్ష్యంగా సీఎం పేర్కొన్నారు. 2034 నాటికి రాష్ట్రంలో కోటి మంది మహిళలను కోటీశ్వరులుగా నిలబెడతామని ఆయన ప్రకటించారు. ఆడబిడ్డలు ఆర్థికంగా బలోపేతం కావడంతో పాటు పుట్టబోయే తరం ఆరోగ్యంగా ఉండేందుకు ఈ చర్యలు తోడ్పడతాయని వివరించారు.

హైదరాబాద్ నగరంలో లక్ష ఇందిరమ్మ ఇళ్ళు నిర్మించి పేదలకు అందజేస్తామని కూడా సీఎం ప్రకటించారు. ఈ కార్యక్రమాన్ని త్వరలో చేపట్టనున్నట్లు తెలిపారు.

మంత్రి సీతక్క ఈ సందర్భంగా మాట్లాడుతూ, 50 ఏళ్ల కిందట తెలంగాణలోనే అంగన్వాడీ కేంద్రాలకు బీజం పడిందని గుర్తుచేశారు. ఆనాటి కాంగ్రెస్ ప్రభుత్వం భూములు ఇచ్చి assets సృష్టించిందని, దాని ఫలితమే ఈ ప్లాంట్ అని వెల్లడించారు. ఈ ప్లాంట్ ద్వారా బలహీన వర్గాల పిల్లలకు, గర్భిణులకు నాణ్యమైన పౌష్టికాహారం సరఫరా అవుతుందని ఆమె వివరించారు.