ఆసిఫాబాద్‌లో రూ.112 కోట్ల అభివృద్ధి పనులకు సీఎం రేవంత్ రెడ్డి శంకుస్థాపన

ముఖ్యమంత్రి రేవంత్ రెడ్డి రేపు (జూన్ 1) కుమరం భీం ఆసిఫాబాద్ జిల్లాలో పర్యటించనున్నారు. ఆయన జిల్లాలో రూ.112.14 కోట్ల విలువైన పలు అభివృద్ధి, సంక్షేమ పనులకు శంకుస్థాపన చేస్తారు.

చింతలమానేపల్లి మండలం కౌటాల గ్రామంలో రూ.56.55 కోట్లతో విద్యుత్ ఉపకేంద్రం, రెబ్బెన మండలం నాంబాల్ గ్రామంలో రూ.6 కోట్ల సౌర విద్యుత్ ప్లాంట్ నిర్మాణాలకు భూమి పూజ నిర్వహిస్తారు. ఆసిఫాబాద్ మున్సిపాలిటీలో రూ.15 కోట్లు, కాగజ్‌నగర్ మున్సిపాలిటీలో రూ.18.70 కోట్లతో చేపట్టే అభివృద్ధి పనులకు శంకుస్థాపన చేస్తారు.

జిల్లా ఇన్‌చార్జి మంత్రి జూపల్లి కృష్ణారావు మాట్లాడుతూ, జిల్లాలో విద్యుత్ మౌలిక సదుపాయాల విస్తరణ, పునరుత్పాదక ఇంధన వినియోగం, పట్టణ మౌలిక వసతుల అభివృద్ధికి ప్రభుత్వం ప్రాధాన్యం ఇస్తోందని తెలిపారు.