పాలమూరు జిల్లా సాగునీటి ప్రాజెక్టుల పనులు పరిశీలించనున్న సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి ఉమ్మడి మహబూబ్‌నగర్ జిల్లాలోని సాగునీటి ప్రాజెక్టుల స్థితిగతులను పరిశీలించేందుకు రెండు రోజుల పర్యటన ప్రారంభించారు. నారాయణపేట, కొడంగల్, పాలమూరు రంగారెడ్డి తదితర ప్రాంతాల్లో పెండింగ్‌లో ఉన్న పనులను ఆయన క్షేత్ర స్థాయిలో చూడనున్నారు.

మొదటి రోజు సాయంత్రం నాగర్‌కర్నూల్ జిల్లా కొల్లాపూర్ మండలంలోని సోమసిల వద్ద బస చేసి, ఉమ్మడి జిల్లాలోని ప్రధాన ప్రాజెక్టులపై అధికారులతో ఉన్నత స్థాయి సమీక్ష నిర్వహించనున్నారు. రెండో రోజు ఉదయం ఎల్లూరు పంప్ హౌస్ సందర్శించి, పాలమూరు రంగారెడ్డి ఎత్తిపోతల పథకం ప్యాకేజీలు, నర్లాపూర్ రిజర్వాయర్, కల్వకుర్తి ఎత్తిపోతల పథకం పంప్ హౌస్‌లను పరిశీలిస్తారు. పిఆర్‌ఎల్‌ఐ ప్రాజెక్టులోని కరివేన రిజర్వాయర్ ప్యాకేజీల పనులను ఏరియల్ వ్యూ ద్వారా పర్యవేక్షిస్తారు.

ఈ పర్యటనలో భాగంగా జడ్చర్లలో భారీ బహిరంగ సభలో పాల్గొని, అనంతరం హైదరాబాద్‌కు తిరిగి వెళ్తారు. ఇటీవల జిల్లా ప్రజాప్రతినిధులతో సమావేశమైన ముఖ్యమంత్రి, ప్రాజెక్టులు పూర్తి చేసేందుకు అవసరమైన నిధులు కేటాయిస్తామని తెలిపారు.

ఇదిలావుండగా, పాలమూరు రంగారెడ్డి బ్యాలెన్సింగ్ పనులు అన్నీ పూర్తి చేయాలని, ప్రాజెక్టు నుంచి నీటిని ఇతర ప్రాంతాలకు తరలిస్తే మరో ఉద్యమం తప్పదని మాజీ మంత్రి నాగం జనార్దన్ రెడ్డి డిమాండ్ చేశారు. ప్రభుత్వం ప్రతిపక్ష సూచనలను సానుకూలంగా తీసుకుని పనులు వేగవంతం చేయాలని మరో మాజీ మంత్రి శ్రీనివాస్ గౌడ్ కోరారు.