కొడంగల్‌లో ₹10,000 కోట్ల అభివృద్ధి పనులు ప్రారంభించనున్న CM రేవంత్ రెడ్డి

కొడంగల్ నియోజకవర్గంలో ₹10,000 కోట్ల విలువైన అభివృద్ధి పనులు ప్రారంభించనున్నట్లు ముఖ్యమంత్రి రేవంత్ రెడ్డి తెలిపారు. కొడంగల్‌లో జరిగిన రైతుల సమ్మేళనంలో ఆయన మాట్లాడారు.

తొమ్మిదో తేదీన ఈ అభివృద్ధి పనులు ప్రారంభమవుతాయని ఆయన చెప్పారు. రేపు మహిళల అభివృద్ధిపై మహిళలతో సమావేశం ఏర్పాటు చేసినట్లు తెలిపారు. ఎల్లుండి పారిశ్రామికవేత్తలతో భేటీ, ప్రారంభోత్సవ కార్యక్రమాలు ఉన్నాయని ఆయన పేర్కొన్నారు.

రాజకీయాలు పక్కన పెట్టి అభివృద్ధికి సహకరించాలని ఆయన ప్రజలను కోరారు. 75 ఏళ్లలో ఎంతో మందికి ఓటు వేసినా ప్రాంతానికి న్యాయం జరగలేదని అన్నారు. ఇప్పుడు అందరి సహకారంతో నిధులు, అభివృద్ధి కార్యక్రమాలు వస్తున్నాయని చెప్పారు. రాబోయే 10 ఏళ్లు రాజకీయాలకు అతీతంగా ప్రాంతాన్ని అభివృద్ధి చేసుకుందామని పిలుపునిచ్చారు.

అభివృద్ధిలో కొడంగల్ అందరికంటే ముందుండాలని ఆయన ఆకాంక్షించారు. తనకు కొడంగల్ ప్రజలే ఆత్మబంధువులని, సమయం దొరికినప్పుడల్లా వస్తానని చెప్పారు. కొడంగల్ ప్రజలకు దీపావళి ఒకరోజు ముందే వచ్చిందని ఆయన వ్యాఖ్యానించారు.