ఆదిలాబాద్ విమానాశ్రయాన్ని బహుళ ప్రయోజన కేంద్రంగా మార్చే ప్రతిపాదనపై సీఎం రేవంత్‌తో రాజ్‌నాథ్ సింగ్ భేటీ

ఆదిలాబాద్ జిల్లా విమానాశ్రయాన్ని బహుళ ప్రయోజన కేంద్రంగా అభివృద్ధి చేసే ప్రతిపాదనపై తెలంగాణ ముఖ్యమంత్రి రేవంత్ రెడ్డి కేంద్ర రక్షణ మంత్రి రాజ్‌నాథ్ సింగ్‌తో సమావేశమయ్యారు. విమానాశ్రయం విస్తరణకు రాష్ట్ర ప్రభుత్వం కీలక చర్యలు తీసుకుంటోందని ఆదిలాబాద్ ఎమ్మెల్యే పాయల్ శంకర్ తెలిపారు.

ఆదిలాబాద్ ఎయిర్‌పోర్ట్ కోసం మరో 80 ఎకరాలు అదనంగా సేకరించేందుకు రాష్ట్ర ప్రభుత్వం సిద్ధంగా ఉందని పాయల్ శంకర్ చెప్పారు. కార్గో సేవల ప్రతిపాదనను కేంద్రం సూచన ప్రాయంగా అంగీకరించింది. దీంతో దేశ విదేశాలకు సరుకు రవాణా సౌకర్యం ఏర్పడనుంది. పౌర విమానయాన మంత్రిత్వ శాఖ అదనంగా 450 ఎకరాలు సేకరించాలని రాష్ట్ర ప్రభుత్వాన్ని కోరింది.

ఇదే సమావేశంలో పాయల్ శంకర్ మరో రెండు అంశాలు ప్రస్తావించారు. నెల రోజుల్లో రేణుక సిమెంట్ పరిశ్రమ పనులు ప్రారంభిస్తామని, ఇప్పటికే 90% అనుమతులు వచ్చాయని తెలిపారు. మూతపడిన సీసీఐ పరిశ్రమ స్థలాన్ని ఆసక్తి ఉన్నవారికి అప్పగించే యోచనలో కేంద్రం ఉందని వివరించారు.

భవిష్యత్తులో ఇండస్ట్రియల్ పార్క్, సిమెంట్ పరిశ్రమ, డిఫెన్స్ అకాడమీ, డిఫెన్స్ ట్రైనింగ్ సెంటర్, కార్గో హ్యాండ్లింగ్ స్టేషన్ వంటి ప్రాజెక్టులు అందుబాటులోకి వస్తే 20 వేల నుంచి 25 వేల మంది యువతకు ఉపాధి అవకాశాలు లభిస్తాయని పాయల్ శంకర్ చెప్పారు. ఈ సమాచారాన్ని ప్రజలకు తెలియజేయడానికే ఈ విలేకరుల సమావేశం ఏర్పాటు చేసినట్లు తెలిపారు. ప్రతి ఒక్కరూ సహకరించాలని ఆయన విజ్ఞప్తి చేశారు.