ఎమ్మెల్యే పోటీ కనీస వయసు 21కి తగ్గించాలని సీఎం రేవంత్ రెడ్డి ప్రతిపాదన

తెలంగాణ ముఖ్యమంత్రి రేవంత్ రెడ్డి ఎమ్మెల్యేగా పోటీ చేసే కనీస వయసును 25 నుండి 21 సంవత్సరాలకు తగ్గించాలని ప్రతిపాదించారు. ఈ మేరకు అసెంబ్లీలో మాట్లాడుతూ రాజ్యాంగ సవరణ అవసరమని, ఇండియా కూటమి పార్టీలతో చర్చిస్తామని చెప్పారు.

ప్రస్తుతం ఓటు వేసే హక్కు 18 ఏళ్లకే ఉందని, మేయర్, జెడ్పీ చైర్మన్‌గా పోటీకి 21 ఏళ్లు ఉండగా, ఎమ్మెల్యేకు 25 ఏళ్లు ఉండటం సమంజసం కాదని సీఎం వాదించారు. యువత ఎక్కువగా రాజకీయాల్లోకి రావడం వల్ల అవినీతి తగ్గుతుందని, దేశంలో 60% మంది యువతేనని ఆయన అన్నారు. ఈ నిబంధన మార్చడం ద్వారా చదువుకున్న యువత రాజకీయాల్లో నిలదొక్కుకుంటారని, విదేశాలకు వెళ్లకుండా ఉంటారని సీఎం పేర్కొన్నారు.

విపక్షాలు మాత్రం ఈ ప్రతిపాదన రాజకీయ లబ్ధి కోసమేనని ఆరోపిస్తున్నాయి. 21 ఏళ్ల వయసులో ఎమ్మెల్యేగా నిర్ణయాలు తీసుకునే పరిణతి ఉండదనేది వారి వాదన. ఈ ప్రతిపాదనపై కేంద్రంతో పాటు ఇతర పార్టీల స్పందన తెలియాల్సి ఉంది.