ఆదాయ సమీకరణ, AI వినియోగంపై సీఎం రేవంత్ రెడ్డి కీలక ఆదేశాలు

తెలంగాణ ముఖ్యమంత్రి రేవంత్ రెడ్డి రాష్ట్ర ఆదాయ వనరుల పెంపుపై శనివారం అధికారులు, మంత్రులతో హైదరాబాద్ ఎంసిఆర్ హెచ్ఆర్డీలో సమీక్ష నిర్వహించారు.

ప్రతి శాఖలో ప్రత్యేక చేజింగ్ సెల్ ఏర్పాటు చేసి ఆదాయ వసూళ్లను నిరంతరం పర్యవేక్షించాలని ఆదేశించారు. హెచ్ఎండీఏ, టీజీఐఐసీ, కమర్షియల్ టాక్స్, ఎక్సైజ్ శాఖల్లో ఆదాయ లీకేజీలు జరగకుండా కట్టుదిట్టమైన చర్యలు తీసుకోవాలన్నారు.

ప్రభుత్వ పథకాల అమలులో AI టెక్నాలజీని వినియోగించి లబ్ధిదారుల జాబితాను డైరెక్ట్ బెనిఫిట్ ట్రాన్స్ఫర్ తో అనుసంధానం చేయాలని సూచించారు. ఊహాజనిత బడ్జెట్కు స్వస్తి చెప్పి వాస్తవ పరిస్థితులకు అనుగుణంగా బడ్జెట్ రూపొందించాలని, ప్రాజెక్టులు సకాలంలో పూర్తి చేయాలని ముఖ్యమంత్రి ఆదేశించారు.

ఆర్థిక క్రమశిక్షణ పాటించాలని, ఫలితాలే ప్రామాణికంగా ఉండాలని ముఖ్యమంత్రి స్పష్టం చేశారు. ఈ సమావేశంలో పలువురు మంత్రులు, వివిధ శాఖల ఉన్నతాధికారులు పాల్గొన్నారు.