వడ్లు కొనకుంటే జూన్ 15 తర్వాత ప్రత్యక్ష కార్యాచరణ: సీఎం రేవంత్ రెడ్డి

తెలంగాణ ముఖ్యమంత్రి రేవంత్ రెడ్డి రాష్ట్రం సేకరించిన వడ్లను కేంద్రం తక్షణం కొనుగోలు చేయాలని డిమాండ్ చేశారు. కుమరం భీం జిల్లా కాగజ్ నగర్లో జరిగిన బహిరంగ సభలో ఆయన మాట్లాడుతూ, కేంద్రం వడ్లు కొనకపోతే జూన్ 15 తర్వాత ప్రత్యక్ష కార్యాచరణకు దిగుతామని హెచ్చరించారు.

వడ్లు కొనకపోతే కేంద్ర మంత్రి కిషన్ రెడ్డి ఇంటి ముందు వడ్ల కుప్పలు పోస్తామని, ఆయన తెలంగాణలో తిరగడం కష్టం అవుతుందని సీఎం హెచ్చరించారు. రాష్ట్రం నుంచి 75 లక్షల క్వింటాళ్ల వడ్లు కేంద్రం కొనుగోలు చేయాలని డిమాండ్ చేశారు. రాష్ట్ర ప్రభుత్వం వడ్లు సేకరించి కేంద్రానికి సరఫరా చేస్తుందని, కొనుగోలు చేయడం కేంద్ర ప్రభుత్వ బాధ్యత అని స్పష్టం చేశారు.

రైతులు పండించే పంటలను పూర్తిగా కొనుగోలు చేస్తామని, ఎవరూ ఆందోళన చెందాల్సిన అవసరం లేదని రేవంత్ రెడ్డి భరోసా ఇచ్చారు. సభలో మంత్రులు పొంగులేటి శ్రీనివాస్ రెడ్డి, జూపల్లి కృష్ణారావు, సీతక్క తదితరులు పాల్గొన్నారు.